Истиқболли бошқарув кадрларини танлаб олиш бўйича «Тараққиёт» республика танлови якунлари эълон қилинди

Ўзбекистон Республикаси Президентининг 2018 йил 30 майдаги ПҚ–3755-сонли “Истиқболли бошқарув кадрларини танлов асосида танлаб олишнинг замонавий тизимини яратиш чора-тадбирлари тўғрисида”ги Қарори ижросини таъминлаш мақсадида ташкил этилган истиқболли бошқарув кадрларини танлаб олиш бўйича «Тараққиёт» биринчи республика танлови ниҳоясига етди.

«Тараққиёт» республика танлови давлат ва хўжалик бошқаруви органлари, маҳаллий ижро этувчи ҳокимият органлари ҳамда бошқа давлат органлари ва ташкилотларининг юқори малакали кадрларини аниқлаш ва рағбатлантириш, юқори даражадаги бошқарув компетенциялари ва раҳбарлик фазилатларига эга бўлган истиқболли бошқарув кадрларини танлаш ва қўллаб-қувватлаш, истиқболли бошқарув кадрлари захирасини шакллантириш мақсадида ташкил этилди.

Танловда қатнашиш учун 16 йўналиш бўйича 8000 нафардан зиёд талабгор ариза берган бўлиб, уларнинг 150 нафари танловнинг бошланғич босқичларидан муваффақиятли ўтиб, финал босқичида иштирок этдилар.

Бош прокуратура Академияси ходими Носиржон Асқаров танловда муваффақиятли иштирок этиб, “Суд-ҳуқуқ соҳасида энг яхши бошқарув ходими” номинациясида ғолиб бўлди.

Ғолиб энг кам иш ҳақининг 50 баравари миқдорида бир марталик пул мукофоти ҳамда уч ойлик хорижий стажировка ўташ имкониятига сазовор бўлди.

Шу билан бирга, Н.Асқаров Академиянинг Жиноятларнинг содир этилиши сабабларини тизимли таҳлил қилиш ва ўрганиш маркази бошлиғи лавозимига тайинланди.