Пойтахтимизнинг Чилонзор туманида “Профинспектор” геоахборот тизими жорий этилмоқда

Жорий йилнинг 29 июль куни Бош прокуратура Академиясида Мажбурий ижро бюроси Ахборот-коммуникация технологияларини жорий этиш маркази хамкорлигида Тошкент шаҳар Чилонзор тумани ИИО ФМБ профилактика инспекторлари учун бириктирилган ҳудудни мониторинг қилиш, статистикаси ва назоратини олиб бориш “Профинспектор” таҳлилий геоахборот тизимидан фойдаланиш бўйича тренинг машғулотлари ўтказилди.

Мазкур тизим Ўзбекистон Республикаси Президентининг 2018 йил 24 декабрдаги “Жамоат хавфсизлигини таъминлаш самарадорлигини ошириш бўйича қўшимча чора-тадбирлар тўғрисида”ги ПҚ-4075-сонли қарори вазифаларини амалга ошириш доирасида Академия ташаббуси билан Мажбурий ижро бюроси Ахборот-коммуникация технологияларини жорий этиш маркази томонидан ишлаб чиқилган.

Машғулот жараёнида профилактика инспекторлари веб-портал ҳамда Андроид платформасидаги мобил иловадан ташкил топган тизимнинг имкониятлари билан яқиндан танишишди.

“Профинспектор” тизими жамоатчилик хавфсизлигини таъминлаш самарадорлигини оширишда бир қатор имкониятларни тақдим этади. Хусусан, ҳуқуқбузарлик содир этилиши хавфи мавжуд бўлган масканлар ҳамда жиноят содир этилган жойларни харитада белгилаш, профилактик ҳисобда турувчи шахслар, шу жумладан, муқаддам судланган ва жиноят содир этишга мойил бўлган шахслар, низоли оилалар, вояга етмаганлар ва ёшлар электрон базасини юритиш имкониятлари яратилган.

Шунингдек, бириктирилган ҳудуднинг умумий статистикасини олиб бориш имконияти тизимнинг афзалликларидан бири ҳисобланади.

Дастлаб тизим 2019 йилнинг февраль ойидан синов тариқасида Навоий вилоятида жорий қилинган бўлиб, бугунги кунда уни кейинги босқичма-босқич жорий қилиш ишлари олиб борилмоқда.