Корея Адлия институти таклифи бўйича ташриф

Ҳозирги вақтда Корея Республикаси билан Ўзбекистон Республикаси ўртасида турли йўналишларда, шу жумладан, ҳар иккала давлат Бош прокуратураларининг жамиятда қонун устуворлигини таъминлаш, фуқароларнинг ҳуқуқ ва эркинликларини ҳимоя қилиш, ҳуқуқбузарликларнинг олдини олиш масалалари бўйича ўзаро алоқалар юксак даражада ривожланиб бормоқда.

Жорий йилнинг май ойида Корея Адлия институти Президенти Чо Ин Сок бошчилигидаги Корея делегациясининг Ўзбекистонга ташрифи натижаси сифатида мазкур институт билан Ўзбекистон Республикаси Бош прокуратураси Академияси ўртасида ўзаро ҳамкорлик тўғрисидаги Меморандумнинг имзоланганлиги томонларнинг профессионал алоқаларни кучайтиришдан манфаатдор эканликларини англатади.

Ўз навбатида, Корея Адлия институти Президентининг таклифига асосан мазкур ташрифга жавоб сифатида Бош прокуратура Академияси раҳбари бошчилигидаги ўзбекистонлик делегация аъзоларининг юқорида қайд этилган Меморандум доирасида шу йилнинг 17-18 июль кунлари Корея Республикасига ташриф буюрганлиги ўзаро муносабатларни янада чуқурлаштириш йўлидаги муҳим қадамлардан бири бўлди.

Ташриф давомида Адлия институтида таълим соҳасида олиб борилаётган ишлар, шу жумладан, прокуратура органи ходимларини ўқитиш дастурлари, уларнинг турлари, электрон таълим тизими ва шу каби масалалар ўрганилди. Шунингдек, институтнинг Йонъин шаҳридаги филиалида иккала давлатнинг прокуратура ва суд тизими, уларнинг фаолияти билан боғлиқ долзарб масалаларга бағишланган қўшма семинар ўтказилди.

Бундан ташқари, ташриф дастури доирасида Корея Бош прокурори Мун Муил билан учрашув бўлиб ўтди ва Ўзбекистон Бош прокуратураси билан ҳамкорлик механизмларининг мустаҳкамланаётганлиги муҳим эканлиги таъкидланди. Ўзбекистонлик делегация Корея Бош прокуратурасининг асосий фаолият йўналишлари, амалга оширилаётган сўнгги ўзгаришлар ва ютуқлар билан таништирилди.

Юқори даражада ташкил қилинган ташриф натижаси сифатида томонлар ўзаро ҳамкорлик қилиш дастурини ишлаб чиқиш, прокуратура органлари ходимларини рақамли технологиялар соҳасида ўқитишда кўмаклашиш, таълим ва илмий йўналишларда академик тажриба алмашиш, шу жумладан, тингловчиларнинг стажировкасини ташкил қилиш ва бошқа шу каби муҳим масалалар бўйича ҳамкорлик истиқболларини белгилаб олишди.