Бош прокуратура Академиясида прокуратура органлари раҳбар кадрларини касбий қайта тайёрлаш курси якунланди

Ўзбекистон Республикаси Бош прокуратураси Академиясида прокуратура органларида раҳбарлик лавозимларини эгаллаш учун захирада турган кадрларни касбий қайта тайёрлаш курси якунланди.

Мазкур курс Ўзбекистон Республикаси Президентининг 2018 йил 8 майдаги “Прокуратура органлари кадрларини тайёрлаш, қайта тайёрлаш ва уларнинг малакасини ошириш тизимини тубдан такомиллаштириш чора-тадбирлари тўғрисида”ги ПФ–5438-сонли Фармонида белгиланган вазифалардан келиб чиққан ҳолда янги форматда ташкил этилди.

Курс дастури бошқарув ва менежмент асосларини ташкил этишнинг инновацион шакллари ва методларини ўзлаштириш, раҳбар кадрларнинг билим ва бошқарув кўникмаларини ривожлантиришга, тингловчиларнинг етакчилик фазилатларини мустаҳкамлашга йўналтирилди.

Қайта тайёрлаш курси замонавий ахборот-коммуникация технологиялари, ўқитишнинг инновацион ёндашув ва технологияларини қўллаган ҳолда ташкил этилди. Ўқув машғулотларини ўтказишга Академия профессор-ўқитувчилари билан бир қаторда Ўзбекистон Республикаси Олий Мажлиси Сенати ҳамда Қонунчилик палатаси, Адлия вазирлиги, Ташқи ишлар вазирлиги, Ички ишлар вазирлиги, Ўзбекистон Республикаси Президенти ҳузуридаги Лойиҳа бошқаруви миллий агентлиги, “Тараққиёт стратегияси” маркази, шунингдек, Академия ҳамкорлари – нуфузли хорижий таълим ва илмий-тадқиқот муассасалари вакиллари жалб этилди.

Олти ойлик мазкур курсда ўқитиш блок-модуль тизими асосида ташкил этилган бўлиб, ҳар бир ўқув блоки бўйича аудитория машғулотлари касбий кўникма ва малакаларни такомиллаштириш, прокурор-тергов ишининг илғор ютуқларини ўргатиш, шунингдек, прокуратура органлари ходимлари фаолиятидаги тизимли камчиликларни бартараф этишга йўналтирилган амалиётни ўташ билан бирга ташкил этиб борилди.

Амалиётни ўташ жараёнида тингловчилар ўз касбий фаолиятидан келиб чиқиб танлаган долзарб мавзулар бўйича илмий-тадқиқот фаолиятини амалга ошириб бордилар. Илмий ишлар натижалари битирув имтиҳонлари жараёнида тақдимот қилинди.

Шунингдек, бир гуруҳ тингловчилар Россия Федерацияси Президенти ҳузуридаги Россия халқ хўжалиги ва давлат хизмати академияси филиали – Сибирь бошқарув институти фаолияти билан танишиш учун ташрифни амалга оширдилар. Ташриф давомида тингловчилар “Коррупцияга қарши курашиш соҳасидаги давлат сиёсати” мавзусида ўқув курсида қатнашдилар ҳамда курс якуни бўйича уларга малака ошириш тўғрисида гувоҳномалар берилди.

Битирувчиларга касбий қайта тайёрлаш ҳақида дипломлар топширилди.