2019 йилнинг биринчи ярмидаги фаолият натижалари муҳокама қилинди

Ўзбекистон Республикаси Бош прокуратураси Академиясида ўтган давр мобайнида таркибий тармоқлар томонидан амалга оширилган фаолият натижалари кўриб чиқилиб, устувор фаолият йўналишлари белгилаб олинди.

Хусусан, Академия профессор-ўқитувчиларининг илмий салоҳиятини мустаҳкамлаш, амалий аҳамиятга эга бўлган долзарб мавзулар бўйича илмий-тадқиқот фаолиятини амалга ошириш бўйича чора-тадбирлар муҳокама қилинди.

Ўқув модуллари, режа ва дастурларини ишлаб чиқиш, шунингдек тингловчиларнинг аниқланган эҳтиёжларини инобатга олган ҳолда уларни тизимли равишда янгилаб бориш масаласига алоҳида эътибор қаратилди.

Академия кафедраларининг ўқув-методик базани кенгайтириш ва янгилаш, ўқув-услубий қўлланмалар, амалдаги қонунчилик ва ҳуқуқни қўллаш амалиётининг долзарб муаммолари бўйича илмий мақолалар тайёрлаш ва нашр қилиш борасидаги фаолияти кўриб чиқилди.

Муҳокамалар жараёнида масофавий ҳамда аралаш курслар ташкил этиш воситасида тингловчилар контингентини янада кенгайтириш истиқболлари белгилаб олинди, шунингдек энг замонавий педагогик технологиялар ва мультимедиа имкониятларини қўллаган ҳолда тегишли таълим контентини изчил такомиллаштириб ва тўлдириб бориш зарурлиги таъкидлаб ўтилди.

Прокурор-тергов соҳаси ходимларини қайта тайёрлаш ва малакасини ошириш курсларининг амалий аҳамиятга эга бўлишида Академиянинг махсус жиҳозланган имитация ўқув хоналарида тизимли янгиланиб бориладиган казуслар ва ишчан ўйинлар сценарийлари бўйича ўтказиладиган амалий ва вазиятли ўқув машғулотлари муҳим ўрин тутади.  

Академия таркибий тармоқлари илмий ва таълим салоҳиятини мустаҳкамлаш, таълим сифатини ошириш ҳамда илғор хорижий тажрибани жорий этиш мақсадида идоралараро ва халқаро ҳамкорликни кенгайтириш борасида аниқ вазифалар белгилаб олинди.

Таълим, илм-фан ва амалиётнинг интеграциялашувини таъминлаш, юқори малакали, ташаббускор, янгича фикрлайдиган, ўз халқига садоқатли кадрларни тайёрлаш мақсадида ҳуқуқни муҳофаза қилиш тизими ходимларини қайта тайёрлаш ва малакасини ошириш тизими самарадорлигини янада ошириш устувор вазифа сифатида белгилаб олинди.