Бош прокуратура Академиясининг Қорақалпоғистон Республикасидаги навбатдаги тадбирлари

Бош прокуратура Академияси ходимлари Қорақалпоғистон Республикасида ички ишлар ва прокуратура органлари фаолиятининг самарадорлиги масалаларини ўрганиш, шунингдек ҳуқуқбузарликлар профилактикаси, жиноятчиликка қарши курашиш ва жамоат хавфсизлигини таъминлаш борасида амалий ёрдам беришга қаратилган навбатдаги тадбирларни амалга оширди.

Ташкил этилган учрашувлар давомида ахборот технологияларини кенг қўллаган ҳолда фуқароларнинг ўзини ўзи бошқариш органлари ҳамда жамоат ташкилотларини ҳуқуқбузарликлар профилактикаси фаолиятига жалб этиш, шунингдек эксперт-таҳлил гуруҳларининг фаолиятини ташкиллаштириш масалалари муҳокама қилинди. Ҳар бир туман миқёсида ҳуқуқбузарлик ва жиноятлар спецификаси ҳамда уларнинг содир этилиш сабаблари таҳлил қилинди.

Профилактика инспекторлари билан ҳудудларда “Профинспектор” дастурини қўллаш бўйича амалий машғулотлар ташкил этилди. Мазкур дастурни ишлатиш жараёнида юзага келаётган муаммоли жиҳатлар муҳокама қилиниб, уларни ҳал этиш йўллари белгилаб олинди.