Калифорния университети Гастинг ҳуқуқ мактаби (АҚШ) билан ҳамкорликда Академия магистратураси ва юридик клиникаси салоҳиятини мустаҳкамлаш

Ўқитишнинг инновацион шакл ва методлари соҳасидаги илғор хорижий тажрибани таълим жараёнига имплементация қилиш мақсадида жорий йилнинг 6-12 август кунлари Калифорния университети Гастинг ҳуқуқ мактаби (АҚШ) профессори Май Ли Спенсернинг Бош прокуратура Академиясига ташрифи ташкил этилди.

Ташриф олдидан Гастинг ҳуқуқ мактаби профессорлари Ивонн Троя ва Май Ли Спенсер томонидан июнь-август ойлари давомида магистратура дастурлари ва Академия юридик клиникасининг комплекс таҳлили амалга оширилди ҳамда Гастинг ҳуқуқ мактаби тажрибасини инобатга олган ҳолда тегишли тавсиялар ишлаб чиқилди.

Май Ли Спенсернинг ташриф дастуридан Академия тингловчилари ва ходимлари иштирокидаги қатор учрашув ҳамда ўқув тадбирлари ўрин олди.

6-8 август кунлари клиник таълим масалалари бўйича тренерлар учун ўқув клиник курслар ва дастурлар дизайнини ишлаб чиқиш, вазиятлар муҳокамаларини ўтказиш, тингловчиларнинг индивидуал ўқув йўналишини кузатиш ва баҳолаш масалаларида ўқитувчиларнинг педагогик маҳоратини оширишга бағишланган уч кунлик тренинг ўтказилди.

Магистратура ва кадрларни профессионал қайта тайёрлаш курслари ўқув дастурларини ишлаб чиқиш бўйича ишчи гуруҳ аъзолари билан бўлган учрашув давомида тингловчиларнинг юридик клиникадаги фаолиятига оид интенсив ўқув дастури лойиҳаси ишлаб чиқилди.

Дастур лойиҳаси клиник таълим сифатига қўйилган талабларлар ва принципларни инобатга олган ҳолда ишлаб чиқилган бўлиб, самарали юридик консультация, муаммони тизимли ечиш, ҳуқуқий таҳлил, фаол тақдимот, суҳбат ўтказиш кўникмаларини ривожлантиришга йўналтирилди.

Май Ли Спенсер Академия магистратура бўлими ҳамда юридик клиникасининг ҳимояга муҳтож аҳолига ҳуқуқий ёрдам кўрсатиш мақсадида фуқароларни қабул қилишни ташкил этиш фаолияти билан танишди.

Тадбир якунида мақсадли ўқув дастурларини ишлаб чиқиш, академик мобилликни ривожлантириш, қўшма лойиҳаларни амалга ошириш масалалари бўйича келгуси ҳамкорлик истиқболлари муҳокама қилинди.