Хорижий мамлакатлар одил судловининг хусусиятларини ўрганиш мақсадида халқаро экспертлар иштирокидаги давра суҳбати

2019 йил 8-9 август кунлари Бош прокуратура Академиясида “Минтақавий мулоқот” ХННТ ҳамкорлигида хорижий мамлакатларнинг одил судловни амалга оширишдаги тажрибасини ўрганиш масаласида халқаро экспертлар иштирокида давра суҳбати ўтказилди.

Эксперт сифатида Люксембург университетининг ҳуқуқ, иқтисодиёт ва молия факультети декани, профессор С.Браум ва “Минтақавий мулоқот” халқаро нодавлат ташкилоти мутахассиси Г.Уэддл иштирок этишди.

Давра суҳбати давомида С.Браум Германия Федератив Республикаси жиноят қонунчилигида “ножўя қилмиш” (проступок) атамасининг юридик мазмуни, шунингдек рецидив жиноятлар ва пробация институтларини қўллашнинг хусусиятлари ҳақида маълумот берди.

Бундан ташқари, Г.Уэддл томонидан “айбига иқрорлик ҳақида судга қадар келишув” институти, айбланувчи томонидан айбига иқрорлик ҳақида судга қадар келишув имзоланган ҳолатда жиноят ишларини тергов қилиш ва судда кўриб чиқишнинг ўзига хос хусусиятлари ҳақидаги АҚШ тажрибаси тақдим қилинди.

Шунингдек, ҳуқуқбузарликларнинг ўз хусусиятига кўра жиноят ва ножўя қилмишларга бўлинишининг АҚШ тажрибаси ўрганилди.

Ўз навбатида, Академия ходимлари халқаро экспертларга жиноят ва жиноят-процессуал қонунчилигини такомиллаштириш бўйича миллий концепция билан таништириб, билдирилган халқаро тажрибани амалдаги қонунчиликка ўзгартириш ва қўшимчалар киритиш жараёнида қўллаш имконияти ҳақида билдиришди.

Тадбир якунида жиноят ва жиноят-процессуал қонунчилигини такомиллаштириш юзасидан эксперт кўмаги бўйича ҳамкорлик масалалари муҳокама қилинди.