Коррупцияга қарши курашиш соҳасидаги амалиётчилар учун тренинг

Бош прокуратура Академиясида 2019 йилнинг 5-8 август кунлари Иқтисодий ҳамкорлик ва ривожланиш ташкилоти томонидан “Ўзбекистон учун ИҲТТнинг коррупцияга қарши курашиш лойиҳаси” доирасида Ўзбекистон Республикасининг ҳуқуқни муҳофаза қилувчи органлари ходимлари учун “Коррупция учун жиноий жавобгарлик” мавзусидаги махсус тренинг ташкил этилди.

Тренинг ўқитишнинг аралаш шаклида (blended learning) сиртқи (масофавий ўқитиш – презентация, қўшимча маълумотлар ва синов топшириқлари) ва кундузги (интерфаол маърузалар, муҳокамали сессиялар, гуруҳларда ишлаш) сессиялар асосида ўтказилди.

Курс тренерлари сифатида Милан прокуратурасининг Иқтисодий жиноятларга қарши курашиш департаменти прокурори Доната Коста (Италия), Миллий молиявий прокуратуранинг Коррупция ва солиқнинг ўта оғир жиноятларига қарши курашиш бошқармаси прокурори Винсент Филхол (Франция), ИҲТТнинг экспертлари Андрий Кухарук, Виталий Касько, Бош прокуратура Академиясининг Коррупцияга қарши курашиш илмий-таълим маркази ходимлари қатнашишди.

Тренинг давомида коррупцияга қарши курашиш соҳасидаги халқаро стандартлар, уларни имплементация қилиш бўйича хорижий мамлакатлар тажрибаси, шунингдек коррупцияга оид жиноятларни тергов қилиш ва жиноий даромадларни легаллаштиришга қарши курашиш бўйича амалий мисоллар таҳлил қилинди.

Тўрт кун давомида прокуратура, ички ишлар ва давлат хавфсизлиги органларининг тергов тармоқлари ҳамда таълим муассасалари вакиллари коррупцияга оид ҳолатларни криминализация қилишнинг назарий ва амалий жиҳатларини таҳлил қилишди ва амалиётдаги аниқ мисолларни муҳокама қилишди.

Ўқув тренинги иштирокчиларга коррупцияга қарши курашишнинг замонавий воситалари ва усуллари билан танишишга, коррупция ва оғир молиявий жиноятларни аниқлаш, жиноий даромадларни легаллаштиришда гумонланувчи шахсларни таъқиб қилиш борасидаги билимларини ошириш имконини берди.