Қўшма ўкув-семинар машғулоти ўтказилди

Ўзбекистон Республикаси Бош прокуратура Академиясида 2019 йилнинг 14 августида  Судьялар олий кенгаши ҳузуридаги Судьялар олий мактаби, Ички ишлар вазирлиги ҳузуридаги Тергов департаменти ҳамда  Адвокатлар палатаси билан ҳамкорликда Бош прокуратура Академияси ҳамда Судьялар олий мактаби тингловчилари, шунингдек терговчилар ва адвокатлар иштирокида қўшма ўқув-семинар машғулоти ташкиллаштирилди.

Қўшма ўқув-семинар машғулоти доирасида “Одам савдоси жиноятига қарши кураш: муаммо ва ечим” ҳамда “Ҳуқуқни муҳофаза қилувчи идоралар ходимлари ўртасида мулоқот маданияти ва суд процессида касб этикаси қоидаларига риоя этиш” мавзулари тингловчиларнинг фаол иштироки таъминланган холда муҳокама этилди.

Жумладан,  қўшма ўқув-семинар машғулоти давомида одам савдоси билан боғлиқ жиноятларни тергов қилиш ва судда кўриш жараёнида амалиётда юзага келаётган муаммолар, ушбу жиноятлар бўйича далиллар доираси ва уларни тўплаш, текшириш ва баҳолаш, жиноят квалификацияси  ва бошқа бир қатор масалалар муҳокама этилди.

Шунингдек, қўшма ўқув-семинар машғулотида ҳуқуқни муҳофаза қилувчи идоралар ходимлари ўртасида мулоқот маданияти, суд жараёнларида прокурор, суд, адвокатнинг касб этикаси қоидаларига қатъий амал қилиши, шу билан бирга амалиётда учраётган айрим салбий вазиятлар хусусида фикр юритилди.

Тадбир иштирокчилари қонунчиликни такомиллаштириш борасида ҳам бир қатор таклифларни илгари сурдилар.

Тадбирда қўшма ўқув машғулоти амалиётдаги муаммолар ва уларнинг ечими юзасидан прокурорлар, судьялар, терговчи ва адвокатларнинг фикр ва мулоҳазаларини жамлаган мулоқот майдончаси бўлганлиги алоҳида эътироф этилди.

Тадбир якунида прокурор, суд, тергов ходимлари ва адвокатларнинг  қўшма ўқув машғулотларини давом эттириш мақсадга мувофиқлиги хусусида қарор қабул қилинди.

Семинар якунида иштирокчилар Ўзбекистон Республикаси Бош прокуратураси Академиясининг фаолияти билан танишдилар.