Бош прокуратураси Академиясида сайёр суд мажлиси

Бош прокуратура Академиясида ташкиллаштирилаётган ўқув курслари Ўзбекистон Республикаси Президентининг 2018 йил 8 майдаги “Прокуратура органлари кадрларини тайёрлаш, қайта тайёрлаш ва уларнинг малакасини ошириш тизимини тубдан такомиллаштириш чора-тадбирлари тўғрисида”ги ПФ-5438-сон Фармони талабларидан келиб чиққан холда ўқитишнинг амалий хусусиятига ва прокуратура органларининг касбий фаолияти билан узвий боғлиқликка алоҳида аҳамият берилган холда амалга оширилмоқда.

Жумладан, жорий йилнинг 20 августида Академиянинг суд зали ўқув-иммитация хонасида “Жиноят суд процессида прокурор ваколатларини таъминлашнинг самарадорлигини ошириш масалалари” мавзусида ташкиллаштирилган малака ошириш ўқув курсининг тингловчилари учун жиноят ишлари бўйича Юнусобод туман судининг судьяси Ф.Исмаилова раислиги остида, давлат айбловчиси шу туман прокурор ёрдамчиси Ж.Усмонов иштирокида қонунга хилоф равишда Ўзбекистон Республикасига кириш жиноий ҳаракатларини содир этган ва Жиноят кодексининг 223-моддаси биринчи қисми билан айбланиб судга берилган О.В.га нисбатан жиноят иши бўйича сайёр суд мажлиси ташкиллаштирилди.

Суд процесси якунланганидан сўнг судья Ф.Исмаилова ва Академиянинг судларда прокурор ваколатини таъминлаш кафедраси ўқитувчилари ҳамда тингловчилари иштирокида давра суҳбати ўтказилиб, унда кўрилган конкрет жиноят  ишининг таҳлили, мазкур тоифадаги жиноят ишлари бўйича шаклланган суд амалиёти, мазкур тоифадаги жиноятларни тергов қилиш ва судда кўриш жараёнида учраётган муаммолар атрофлича муҳокама этилди.