Бош прокуратура Академияси тингловчиларининг Олий суд мажлисида сайёр машғулоти

 “Жиноят суд процессида прокурор ваколатларини таъминлашнинг самарадорлигини ошириш масалалари” мавзусида Академияда ташкиллаштирилган малака ошириш ўқув курсининг тингловчилари учун жорий йилнинг 22 августида Ўзбекистон Республикаси Олий судида сайёр машғулот ташкиллаштирилди.

Ушбу машғулот давомида тингловчилар бевосита назорат инстанция судида конкрет тоифадаги жиноят ишларини назорат тартибида кўриш бўйича ўтказилган суд мажлисларида иштирок этдилар.

Ўзбекистон Республикаси Олий суди жиноят ишлари бўйича судлов ҳайъати томонидан жиноят ишлари жазони ижро этиш муассасаларида  узоқ муддат давомида жазони ўтаётган маҳкумаларнинг назорат тартибидаги шикоятларига асосан кўрилиб, мамлакатимизда амалга оширилаётган суд-ҳуқуқ ислоҳотлари шароитида қонунчиликка киритилган жавобгарликни либераллаштириш билан боғлиқ нормалар ҳамда инсонпарварлик тамойилларидан келиб чиқиб, бир қатор жиноят ишлари бўйича суд ҳукмларини ўзгартириш ҳақида қарорлар қабул қилинди. Бир қатор маҳкумаларга нисбатан қуйи судлар томонидан тайинланган жазолар енгиллаштириб, уларга тайинланган озодликдан маҳрум қилиш жазолари ўталган деб топилиб суд залидан озод қилиндилар.

Ушбу жиноят ишларининг кўрилишида суд залида ҳозир бўлган тингловчилар юқори турувчи суд инстанциясида прокурорнинг иштироки, унинг ҳар бир кўрилган жиноят иши доирасидаги позицияси, юқори турувчи суд инстанциясида ишнинг кўрилиши натижалари бўйича прокурор фикрида акс эттириладиган масалалар, жазо тайинлаш ва жазодан озод қилиш масалалари бўйича назорат суд инстанциясининг амалиёти билан яқиндан танишдилар.

Сайёр машғулот якуни бўйича Академиянинг судларда прокурор ваколатини таъминлаш кафедраси ўқитувчилари ва тингловчилари суд-прокурор амалиётидаги бир қатор масалалар бўйича фикр алмашдилар.