Бош прокуратура Академияси магистратурасига кириш имтиҳонлари

2019 йил 4 сентябрь куни Халқаро бизнес марказининг конференц-залида Бош прокуратура Академияси магистратурасига кириш ёзма имтиҳони бўлиб ўтди. Ёзма имтиҳон чет тили бўйича тест саволлари ва ҳуқуқий мавзудаги эсседан иборат.

Академия қабул комиссияси томонидан кириш имтиҳонини холис, очиқ ва шаффоф ўтказилишини таъминлаш мақсадида комплекс чора-тадбирлар амалга оширилган.

Хусусан, чет тили бўйича тест саволларини тузиш, имтиҳонни ўтказиш ва жавобларини баҳолаш учун Давлат тест маркази жалб қилинган.

Ёзма имтиҳонни ўтказишда кузатувчи ҳамда имтиҳон жавобларини текширишда мутахассис сифатида турли таълим муассасалари, жамоат ташкилотлари ва бошқа идоралар вакиллари таклиф қилинган.

Имтиҳон билетлари автоматик тарзда электрон генерация қилиниб, ҳар бир номзодга индивидуал идентификацион рақам берилган, имтиҳон жавоблари эса тўлиқ шифрланган.

Имтиҳонни ўтказиш жараёни тўлиқ видеотасвирга олиниб, Бош прокуратура Академиясининг Фейсбукдаги расмий саҳифаси орқали онлайн тарзда намойиш қилиниши ташкиллаштирилган (www.facebook.com/ProsecutorAcademy).

Эссе мавзулари, билетлар, суҳбат саволлари, шунингдек абитуриентлар рўйхати ва уларнинг имтиҳонга кириш вақтлари Бош прокуратура Академиясининг расмий веб-сайтида олдиндан эълон қилинган (http://proacademy.uz/uz/posts/0187).

Магистратурага танлов “юриспруденция” мутахассислиги бўйича олий юридик маълумотга эга бўлган шахслар, шу жумладан амалдаги прокуратура органлари ходимлари орасида ўтказилаётганлигини эслатиб ўтамиз.

Академия магистратурасининг “прокурорлик фаолияти”, “тергов фаолияти” ва “коррупцияга қарши курашиш” йўналишлари бўйича 2019/2020 ўқув йилига жами 30 та қабул квоталари тасдиқланган, Академия магистратурасида таҳсил олиш учун 310 нафар номзод ҳужжат топширган, шундай қилиб ҳар бир ўрин учун 10 дан ортиқ киши иштирок этди.

Суҳбат шаклида кириш имтиҳонининг иккинчи босқичи 9-11 сентябрь кунлари ўтказилиши режалаштирилган.