Суд жараёнида прокурор ваколатини таъминлаш самарадорлигини ошириш бўйича малака ошириш курси якунланди

Ўзбекистон Республикаси Бош прокуратураси Академиясида Қорақалпоғистон Республикаси, вилоятлар, Тошкент шаҳри прокуратуралари ва уларга тенглаштирилган прокуратуралар ходимлари учун “Жиноят суд процессида прокурор ваколатларини таъминлашнинг самарадорлигини ошириш масалалари” мавзусида навбатдаги малака ошириш курси якунланди.

Курс дастури амалий ўқув машғулотларидан иборат бўлиб, мавзулар алоҳида турдаги жиноят ишларини ҳал қилишда мавжуд тизимли муаммолар, шунингдек, алоҳида ўрганиш талаб этиладиган жиноят ва жиноят-процессуал қонунчилиги масалалари доирасидан келиб чиқиб шакллантирилган.

Хусусан, суд жараёни имитацияси ўқув хонасида тингловчилар иштирокида амалиётда муаммолар мавжуд бўлган тоифадаги ишларни кўриб чиқиш бўйича суд жараёни имитациялари ўтказилди.

Шунингдек, тингловчилар учун жиноят ишлари бўйича Юнусобод туман судининг судьяси Ф.Исмаилова раислиги остида, давлат айбловчиси шу туман прокурори ёрдамчиси Ж.Усмонов иштирокида сайёр суд мажлиси ташкил этилди.

Ўқув курси дастури шунингдек амалдаги қонунчиликка киритилган янгиликларни қўллаш, суд жараёнида прокурор ваколатини таъминлаш бўйича фаолиятни самарали ташкил этиш, суд-прокурор амалиётини умумлаштириш методикаси ва аниқ ҳисоботлар тайёрлаш масалаларини қамраб олди.

Малака ошириш курси доирасида Судьялар олий кенгаши ҳузуридаги Судьялар олий мактаби, ИИВ Тергов департаменти ва Адвокатлар палатаси билан ҳамкорликда “Ҳуқуқни муҳофаза қилувчи орган ходимларининг суд жараёни иштирокчилари билан мулоқот қилиш маданияти” мавзусида қўшма ўқув семинари ташкил этилди. Семинарда суд жараёнида ҳуқуқни муҳофаза қилувчи органлар ҳамда судьялар касбий этикаси ва мулоқот маданияти масалалари атрофлича муҳокама қилинди. Тадбир иштирокчилари касбий этика қоидаларининг бузилиши билан боғлиқ бўлган амалиётда мавжуд ҳолатларни кўриб чиқиб, уларнинг олдини олиш чораларини муҳоқама қилдилар.

Курс тингловчилари бир қатор амалиёт материаллари, шу жумладан алоҳида тоифадаги жиноят ишлари бўйича шаклланган суд-прокурор амалиёти ҳужжатларини кўриб чиқиб, амалиётнинг энг долзарб муаммолари юзасидан тегишли тавсияларни ишлаб чиқдилар.