Бош прокуратура Академияси магистратурасига кириш имтиҳонларининг якуний босқичи

2019 йил 9-11 сентябрь кунлари Бош прокуратура Академиясида магистратурага кириш имтиҳонларининг чет тили бўйича тест синови ва ҳуқуқий мавзуда эссе босқичларидан муваффақиятли ўтган номзодлар билан суҳбат бўлиб ўтмоқда.

Ўзбекистон Республикаси Бош прокуратураси Академияси магистратурасига қабул қилиш ва ўқитишни ташкил этиш тартиби тўғрисидаги низомга мувофиқ, эссе учун белгиланган максимал баллнинг 56 фоизи ва ундан ортиқ балл тўплаган номзодлар суҳбатга киритилди.

Кириш имтиҳонини ўтказишда холислик, очиқлик ва шаффофликни таъминлаш мақсадида суҳбат бўйича комиссия фаолиятига турли таълим муассасалари, жамоат ташкилотлари ва бошқа идоралар вакиллари кузатувчилар ва мутахассислар сифатида жалб этилган.

Имтиҳон билетлари автоматик тарзда электрон генерация қилиниб, суҳбат ўтказиш жараёни кириш имтиҳонларининг олдинги босқичлари сингари тўлиқ видеотасвирга олиниб келинмоқда.

Суҳбат саволлари, шунингдек бўлиб ўтган кириш имтиҳонлари натижалари Бош прокуратура Академиясининг расмий веб-сайтида эълон қилинган (www.proacademy.uz/uz).

Эслатиб ўтамиз, Ўзбекистон Республикаси Президентининг “Прокуратура органлари кадрларини тайёрлаш, қайта тайёрлаш ва уларнинг малакасини ошириш тизимини тубдан такомиллаштириш чора-тадбирлари тўғрисида”ги Фармонига мувофиқ жорий ўқув йилида илк маротаба Академия магистратурасига қабул ўтказилмоқда.

Академия магистратурасининг “прокурорлик фаолияти”, “тергов фаолияти” ва “коррупцияга қарши курашиш” йўналишлари бўйича 2019/2020 ўқув йилига жами 30 та қабул квотаси тасдиқланган, Академия магистратурасида таҳсил олиш учун 310 нафар номзод ҳужжат топширган.

Бош прокуратура Академияси мамлакатимизда амалга оширилаётган кенг миқёсли ислоҳотлардан келиб чиққан ҳолда энг муҳим ва долзарб ҳисобланган “коррупцияга қарши курашиш” йўналиши бўйича мутахассислар тайёрлашни амалга оширадиган биринчи таълим муассасаси ҳисобланади.