Одам савдосига қарши курашиш фаолиятини такомиллаштириш: давлатлараро ҳамкорлик масалалари

2019 йил 17-18 сентябрь кунлари Ўзбекистон Республикаси Бош прокуратураси Академияси томонидан Халқаро миграция ташкилоти билан ҳамкорликда ташкил этилган “Одам савдосига қарши курашиш: олдини олиш, кўмаклашиш, таъқиб этиш, ҳамкорлик” мавзусида тренинг ташкил этилди.

Тадбирда мазкур соҳада назорат фаолиятини амалга ошираётган Тошкент шаҳри, вилоятлар прокуратуралари ва уларга тенглаштирилган прокуратуралар ходимлари иштирок этдилар.

Маърузачи ҳамда экспертлар сифатида тренингда Беларусь Республикаси ИИВ давлатлараро одам савдосига қарши курашиш бўлими бошлиғи В.Олюшкевич, Аджар Автоном Республикаси прокуратураси ИИВ органларида тергов устидан процессуал бошқарув бўлими прокурори И.Дондоладзе (Грузия), Ўзбекистон Республикаси Инсон ҳуқуқлари миллий маркази директори биринчи ўринбосари М.Тиллабаев, Халқаро миграция ташкилотининг Ўзбекистондаги вакили С.Ташбаев ва бошқалар қатнашдилар.

Тадбир давомида миграция билан боғлиқ глобал ва маҳаллий хавфлар, одам савдосига қарши курашишга оид халқаро-ҳуқуқий ва миллий норматив ҳужжатлар, одам савдоси қурбонларининг шахсини аниқлаш ва қайтариш масалалари муҳокама қилинди, шунингдек Беларусь Республикаси ва Грузиянинг одам савдоси билан шуғулланувчи шахсларни жиноий таъқиб қилиш ва мазкур жиноятлар қурбонларини ҳимоя қилишга оид тажрибаси ва амалиёти кўриб чиқилди.

Тренинг интерфаол услубда ўтказилгани иштирокчиларга одам савдосига қарши курашиш амалиётига оид самарали тажриба алмашиш ҳамда мазкур йўналишда ҳамкорлик истиқболларини белгилаб олиш учун замин яратди.