БМТнинг Судлар ва адвокатлар мустақиллиги масаласи бўйича махсус маърузачиси билан учрашув

2019 йил 20 сентябрь куни Ўзбекистон Республикаси Бош прокуратураси Академияси, Вестминстер университети, Жаҳон иқтисодиёти ва дипломатия университети, Тошкент давлат юридик университети ҳамда ИИВ Академияси профессор-ўқитувчилари ва тингловчиларининг БМТнинг Судлар ва адвокатлар мустақиллиги масаласи бўйича махсус маърузачиси Диего Гарсия-Саян бошчилигидаги делегация билан учрашуви бўлиб ўтди.

Диего Гарсия-Саян алоҳида таъкидлагандек, прокурор, адвокат ва судьялар ўз касбий фаолиятини эркин олиб бориш имкониятига эга бўлишлари, қонун доирасида вазифаларни бажариш чоғида ҳар қандай таҳдид, аралашув ёки босимдан муҳофазаланган бўлишлари лозим.

Махсус маърузачи Ўзбекистонда коррупцияга қарши курашиш борасида қабул қилинган чоралар, шунингдек инсон ҳуқуқлари соҳасидаги халқаро стандартлар акс эттирилган одил судлов тизимини шакллантиришга қаратилган суд-ҳуқуқ тизимида амалга оширилаётган ислоҳотларни ижобий баҳолади.

Учрашувда прокуратура органлари, суд тизимининг мустақил ва холис фаолиятини ташкил этиш, судда тортишув принципини кучайтиришга қаратилган чоралар юзасидан фикр алмашилди.