БМТнинг Наркотиклар ва жиноятчиликка қарши курашиш бошқармаси ҳамда Европа тикланиш ва тараққиёт банки билан коррупцияга қарши курашиш соҳасида ҳамкорлик истиқболлари

2019 йил 19 сентябрь куни Бош прокуратура Академиясида БМТнинг Наркотиклар ва жиноятчиликка қарши курашиш бошқармаси (БМТ НЖҚКБ) ҳамда Европа тикланиш ва тараққиёт банки (ЕТТБ)нинг мониторинг гуруҳи вакиллари билан Марказий Осиё минтақасида коррупцияга қарши кураш ташаббусларига фуқаролик жамияти ва хусусий секторни жалб қилиш масалалари бўйича учрашув бўлиб ўтди.

Мониторинг гуруҳида БМТ НЖҚКБнинг фуқаролик жамияти гуруҳи раҳбари Мирелла Думмар Фрахи, фуқаролик жамияти дастури гуруҳи ходими Андерс Францен, коррупция ва иқтисодий жиноятларга қарши курашиш бўлими эксперти Константин Поликарски, Марказий Осиёда жиноий одил судлов дастури халқаро менежери Кун Маркверинг, шунингдек ЕТТБнинг бош менежери Луиза Балби иштирок этди.

Учрашув давомида мониторинг гуруҳига республикамизда коррупцияга қарши курашиш борасида олиб борилаётган ислоҳотлар ҳақида маълумот берилди. Хусусан, қабул қилинган “Коррупцияга қарши курашиш тўғрисида”ги Қонун, 2017 – 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегияси, шунингдек 2019 – 2020 йилларда коррупцияга қарши курашиш давлат дастури тўғрисида алоҳида тўхталиб ўтилди.

Думмар Фрахи сўнгги йилларда Ўзбекистонда коррупцияга қарши курашиш борасида олиб борилаётган ислоҳотларга юксак баҳо бериб, Марказий Осиёда коррупцияга қарши курашиш соҳасида фуқаролик жамияти ва хусусий секторнинг салоҳиятини ошириш бўйича техник ҳамкорлик лойиҳасини ишлаб чиқиш ва амалга ошириш имкониятларини қайд этди.

Учрашув конструктив мулоқот руҳида бўлиб ўтди, Марказий Осиё минтақасида фуқаролик жамияти ва хусусий секторни коррупцияга қарши кураш ташаббусларига жалб қилиш бўйича лойиҳа таклифларини тайёрлаш юзасидан келишувга эришилди.