Лунд университети билан қўшма тадқиқотлар ўтказиш борасида ҳамкорликни мустаҳкамлаш

Ўзаро ҳамкорлик тўғрисидаги меморандум ижроси доирасида Бош прокуратура Академияси делегациясининг Лунд университети (Швеция)га ишчи ташрифи бўлиб ўтди.

Ташрифдан кўзланган мақсад – “Марказий Осиё ҳуқуқи: Марказий Осиё ҳуқуқий маданиятлари” қўшма лойиҳаси бўйича келгусида амалга оширилиши мўлжалланган тадбирларни муҳокама қилиш эди.

Тўрт йилга мўлжалланган лойиҳа иштирокчи давлатларга стажировкалар ташкил этиш, учрашув ва семинарлар ўтказиш, илмий журналларда мақолалар чоп этиш йўли билан танланган мавзу доирасида тадқиқотлар ўтказишни кўзда тутади.

Ишчи учрашувда Лунд, Хельсинки, Дублин, Латвия, Мармара (Туркия), Карлов (Чехия) университетлари, Гумилёв номидаги Евроосиё миллий университети ва бошқа илмий-ўқув муассасалари делегациялари иштирок этишди.

Лойиҳа координаторлари иштирокчиларга лойиҳанинг мақсади, вазифалари, амалга ошириш муддат ва босқичлари, шунингдек, унинг якуни бўйича кутилаётган амалий натижалар ҳақида маълумот беришди.

Тадбирда қўшма тадқиқотлар ўтказиш, ўзаро академик айирбошлаш, тадқиқот натижаларини муҳокама қилиш бўйича семинарларни ташкил этиш ва ўтказиш механизмлари ишлаб чиқилди.

Лойиҳа келгуси йил март ойи бошида, грант маблағлари келиб тушганидан сўнг расман ишга туширилади.

Учрашув сўнгида иштирокчилар лойиҳани амалга ошириш доирасида ўзаро ҳамкорликни янада ривожлантиришга тайёр эканликларини билдирдилар.