Олий аттестация комиссияси билан амалий ҳамкорлик

2019 йил 24 сентябрь куни Бош прокуратура Академиясида Ҳуқуқий муаммоларни илмий-амалий ва инновацион тадқиқ қилиш ҳамда илмий ходимларни тайёрлаш маркази томонидан “Фан соати” лойиҳаси доирасида “Илмий унвонлар ва илмий даражалар бериш тартиби ҳамда талаблари” мавзуларига бағишланган илмий семинар бўлиб ўтди.

Семинарда Бош прокуратура Академиясининг профессор-ўқитувчилари, докторантлари, мустақил изланувчилари ва фаолияти илмий тадқиқот билан алоқадор ходимлар қатнашди. Семинарда Ўзбекистон Республикаси Вазирлар Маҳкамаси ҳузуридаги Олий аттестация комиссияси раиси, иқтисодиёт фанлари доктори, профессор А.Т.Юсупов маъруза қилди.

Маърузачи томонидан илмий даражалар ва илмий унвонлар бериш тартиби ва талаблари, сўнгги вақтларда илмий даражалар бериш борасида амалга оширилаётган ижобий ўзгаришлар, соҳада учраётган муаммолар ва уларнинг ҳал этишига оид масалалар бўйича батафсил маълумот берилди. Илмий семинар иштирокчилари илмий тадқиқот жараёнларининг долзарб муаммоларига бағишланган муҳокамада фаол қатнашди.

Тадбирдан сўнг профессор А.Т.Юсупов Бош прокуратура Академияси фаолияти билан танишиб чиқди.