Иқтисодий жиноятларга қарши курашиш департаменти ходимлари иштирокида малака ошириш курслари

Жорий йилнинг сентябрь ойида Бош прокуратура Академиясида Иқтисодий жиноятларга қарши курашиш департаментининг суриштирувчилари ва криминалистлари учун малака ошириш курслари ташкил этилди.

Ўқув курслари дастури асосида терговга қадар текширув, суриштирув ва тезкор-қидирув фаолиятини амалга ошириш, мазкур жараёнда фуқаролар ва тадбиркорларнинг хуқуқлари ва қонуний манфаатларини ҳимоя қилиш, бюджет маблағларини талон-торож қилиш, валюта ва қурилиш соҳасида содир этилаётган иқтисодий жиноятларга қарши курашиш ва уларнинг суриштирувини амалга ошириш бўйича ўқув ва амалий машғулотлар ўтказилди.

Курс давомида криминалистик техника ва экспертиза, криминалистика фаолиятида илғор криминалистик ва илмий-техник воситалардан фойдаланиш, қалбаки пуллар, шу жумладан чет эл валюталари, қалбаки ҳужжатлар ва қимматли қоғозларни аниқлаш бўйича амалий машғулотлар, валютага оид ва порахўрлик жиноятларини фош этиш бўйича ўтказиладиган тезкор-қидирув тадбирларини имитация қилиш бўйича машғулотлар ўтказилди.

Дастур доирасида Департамент, Молия ва Қурилиш вазирликлари, Давергеодезкадастр қўмитаси, “Ўзсаноатқурилиш” банки, Ички ишлар вазирлиги Академияси масъул мутахассислари маърузалари билан иштирок этишди, шунингдек Х.Сулаймонова номидаги Республика суд экспертизаси маркази, Ички ишлар вазирлиги Эксперт-криминалистика бош маркази ва ДБҚ Божхона институтида сайёр ўқув машғулотлари ташкил этилди.

Ўқув машғулотлари интерактив шаклда ўтказилиб, тингловчилар ўз фаолиятлари билан боғлиқ долзарб масала ва муаммоларни муҳокама қилиш ҳамда уларнинг ечимига оид ўзаро тажриба алмашиш имкониятига эга бўлишди.