Ғарбий ва Марказий Осиё давлатларининг активларни қайтариш бўйича норасмий тармоғи (ARIN-WCA) Бошқарув гуруҳининг учрашуви бўлиб ўтди

2019 йилнинг 3-4 октябрь кунлари Ўзбекистон Республикаси Бош прокуратураси Академиясида Бирлашган Миллатлар Ташкилотининг Наркотик моддалар ва жиноят бошқармаси билан ҳамкорликда Ғарбий ва Марказий Осиё давлатларининг активларни қайтариш бўйича норасмий тармоғи (ARIN-WCA) Бошқарув гуруҳининг навбатдаги учрашуви бўлиб ўтди.

Учрашувда 2019-2020 йиллар учун мазкур норасмий тармоқнинг Бошқарув гуруҳини ташкил қилувчи давлатлар - Қозоғистон, Қирғизистон, Покистон, Туркманистон ва Ўзбекистон вакиллари ҳамда хорижий экспертлар иштирок этишди.

Учрашув қатнашчилари ва хорижий экспертлар тармоқ бошқарувини назорат қилишни амалга ошириш, стратегик ривожланиш ҳамда унда иштирок этишнинг механизмларини такомиллаштириш, иштирокчиларнинг салоҳиятини ошириш учун ўқув курсларини ташкил қилиш, тармоқнинг навбатдаги умумий йиллик йиғилишини ўтказиш ва шу каби бошқа ташкилий масалаларни муҳокама қилишди.

Бош прокуратура Академияси вакиллари ARIN-WCA Котибияти сифатида тармоқни бошқариш борасида амалга оширилган ишлар ва келгусидаги муҳим режалар тўғрисида Бошқарув гуруҳини хабардор қилишди.

Бошқарув гуруҳининг учрашуви ишчан, информатив ва конструктив тарзда ўтказилиб, унинг якунларига кўра иштирокчилар фаол ҳамкорлик қилишга ҳамда ARIN-WCA тармоғини келгусида янада ривожлантиришга тайёр эканликларини билдиришди.