Тошкент шаҳар, вилоят прокуратуралари ва уларга тенглаштирилган прокуратуралар ходимлари иштирокида малака ошириш курслари

Жорий йилнинг 16 сентябрь – 3 октябрь кунлари Тошкент шаҳар, вилоят прокуратуралари ва уларга тенглаштирилган прокуратураларнинг прокуратура органлари тергов тармоқлари фаолияти устидан назорат ва ички ишлар органларида қонунчилик ижроси устидан назорат бўлимлари прокурорлари учун малака ошириш курслари ташкил этилди.

Ўқув курслари дастури асосида терговга қадар текширув, суриштирув, дастлабки тергов ва тезкор-қидирув фаолиятини амалга ошириш, жумладан, фуқароларнинг бедарак йўқолганлиги ҳолатлари юзасидан терговга қадар текширувни, порахўрлик билан боғлиқ жиноятларни фош этишда тезкор-қидирув фаолиятини амалга ошириш, қотиллик жиноятларини тергов қилиш бўйича ўқув ва амалий машғулотлар ўтказилди.

Курс давомида криминалистик техника ва экспертиза, тергов фаолиятида илғор криминалистик ҳамда илмий-техник воситалардан фойдаланиш бўйича машғулотлар, ҳужжатли тафтиш ва суд-психиатрия экспертизаларини ўтказиш бўйича амалий машғулотлар, сўроқ қилиш ҳамда ҳодиса жойини кўздан кечириш тактикалари бўйича имитация машғулотлари ўтказилди.

Ўқув машғулотлари ўтказишга Бош прокуратура ва Ички ишлар вазирлигининг тажрибали ходимлари ҳамда Х.Сулаймонова номидаги Республика суд экспертизаси маркази мутахассислари жалб қилинди.

Малака ошириш курслари доирасида Ички ишлар вазирлиги Эксперт-криминалистика бош марказида сайёр ўқув машғулотлари ташкил этилди.

Шунингдек, малака ошириш давомида тингловчилар Ўзбекистон Республикаси Бош прокуратураси Академияси томонидан Халқаро миграция ташкилоти билан ҳамкорликда ташкил этилган “Одам савдосига қарши курашиш: олдини олиш, кўмаклашиш, таъқиб этиш, ҳамкорлик” мавзусидаги тренингда иштирок этишди.

Ўқув машғулотлари интерактив шаклда ўтказилиб, тингловчилар ўз фаолиятлари билан боғлиқ долзарб масала ва муаммоларни муҳокама қилиш ҳамда уларнинг ечимига оид ўзаро тажриба алмашиш имкониятига эга бўлишди.