АҚШга танишув сафари

Ўзбекистон Республикаси Бош прокуратураси Академиясининг вакиллари Бош прокуратура делегацияси таркибида жорий йилнинг 16 сентябридан 4 октябрига қадар “АҚШнинг суд тизими ва жиноий одил судлови” мавзусида ташкиллаштирилган танишув сафари билан Америка Қўшма Штатларига ташриф буюрдилар.

Танишув сафари давомида ўзбекистонлик делегация вакиллари АҚШнинг қонун чиқарувчи, ижро ва суд ҳокимиятлари тизимининг институционал асослари, бир қатор давлат органлари, шу жумладан Давлат департаменти, ФТБ, Ички хавфсизлик Вазирлиги идоралари, прокуратура, суд, полиция, жазони ижро этувчи муассасалар ва адвокатура органларининг фаолияти билан танишдилар.

Мазкур идораларда ўтказилган учрашувлар давомида америкалик экспертлар томонидан жиноятчиликка қарши олиб борилаётган кураш, жиноят ишларини тергов қилиш ҳамда судда кўрилишининг процессуал асослари, прокурорнинг жиноий судлов соҳасидаги ваколатлари масалалари тўғрисида батафсил маълумот тақдим этилди.

Делегация вакиллари томонидан америкалик экспертларга жиноят ишлари бўйича шахсни ушлаш ва унга нисбатан эҳтиёт чорасини қўллаш, жиноятларни тавсифлаш, жиноят ишларини тергов қилиш муддатлари, далилларни тўплаш, исботлаш жараёнлари, жиноятчилик билан курашда жамоатчилик иштироки, жиноят ишида шахсни адвокат ҳимояси билан таъминлаш, вояга етмаганларнинг жиноий жавобгарлиги, суд ҳужжатларининг қонунийлигини юқори турувчи суд инстанцияларида кўриш тартиби, электрон иш юритиш ва шунга ўхшаш қатор масалалар хусусида кўплаб саволлар берилди.

Танишув сафари давомида делегация вакиллари юрист кадрларни тайёрлаш ва судьяларни ўқитишга ихтисослаштирилган муқаддас Мария Университетининг юридик мактаби, судьялар миллий колледжи (NJC), суд интизоми масалалари бўйича Комиссия, Грант Сойер номидаги Университетнинг одил судлов масалаларини ўрганиш Марказида ташкиллаштирилган учрашувларда иштирок этиб, ушбу ўқув муассасаларида амалга оширилаётган ўқув жараёни ҳамда ўқитиш методлари билан танишдилар.

Ўз навбатида, бўлиб ўтган учрашувлар давомида ўзбекистон делегацияси томонидан Ўзбекистонда суд-ҳуқуқ соҳасида амалга оширилаётган ислоҳотлар хусусида батафсил маълумот тақдим этилиб, америкалик экспертларнинг одил судловни амалга оширишда шахс ҳуқуқларининг ҳимояси ҳамда одил судловни амалга ошириш жараёни билан боғлиқ бир қатор саволларига жавоб берилди.