«Терроризм ва уюшган жиноятчиликка қарши кураш» халқаро коллоквиумида иштирок

Бош прокуратура Академияси ходимлари Ўзбекистон Республикасининг Олий суди ва бошқа ҳуқуқни муҳофаза қилувчи органлари вакилларидан иборат делегация таркибида жорий йилнинг 14-18 октябрь кунлари Истанбул шаҳрида (Туркия) ўтказилган «Терроризм ва уюшган жиноятчиликка қарши кураш» халқаро коллоквиумида иштирок этдилар.

Мазкур тадбир Туркия ҳамкорлик ва мувофиқлаштириш бўйича агентлиги (ТИКА)нинг Тошкент шаҳридаги ваколатхонаси кўмагида Туркия Адолат академиясида ташкил этилди.

Коллоквиумда Монголия, Қозоғистон, Қирғизистон, Украина ҳуқуқни муҳофаза қилувчи органларининг масъул вакиллари ҳамда терроризмга қарши кураш соҳасидаги ҳалқаро экспертлар иштирок этдилар.

Халқаро терроризм ва уюшган жиноятчилик тушунчалари, давлатларнинг терроризмга қарши кураш борасидаги энг мақбул стратегия ва тажрибалари, шунингдек, терроризм ва уюшган жиноятчилик билан боғлиқ жиноятларни тергов қилиш ҳамда судда муҳокама қилиш самарадорлиги, ушбу соҳадаги халқаро ҳамкорлик масалалари муҳокама қилинди.

Шу билан бирга, иштирокчилар Туркия Адолат академиясида ташкил этилган академик фаолият, терроризм ва уни молиялаштиришга қарши кураш соҳасида олиб борилаётган илмий-тадқиқот ишлари билан таништирилдилар.