Академия магистратураси тингловчилари иштирокида тренинг ўтказилди

2019 йил 25 октябрь куни Ўзбекистон Республикаси Бош прокуратураси Академиясида “Жисмоний имконияти чекланган шахсларнинг фуқаролик жамияти ва ҳуқуқий давлатда тутган ўрни ҳамда иштироки” мавзусида тренинг бўлиб ўтди.

Машғулотни Ўзбекистон ногиронлар Ассоциацияси раисининг ўринбосари, Мирзо Улуғбек номидаги Ўзбекистон Миллий университети кафедраси доценти вазифасини бажарувчи Абдулла Абдухалилов ўтказди.

Тадбирда Бош прокуратура Академияси магистратураси тингловчилари иштирок этди.

Тренингда жисмоний имконияти чекланган шахслар учун тўсиқсиз муҳит яратиш, уларнинг ҳуқуқ ва манфаатлари ҳимоя қилинишини таъминлаш, ногиронлиги бўлган шахслар ҳуқуқларига риоя этилиши устидан жамоатчилик назоратининг таъсирчан механизмларини шакллантириш, шунингдек келгусида мазкур йўналишдаги ишларни янада такомиллаштириш масалалари муҳокама қилинди.