Хоразм вилоятида ҳуқуқбузарликлар профилактикаси бўйича тадбирлар

Бош прокуратура Академияси ходимлари Хоразм вилоятида ички ишлар ва прокуратура органлари фаолиятининг самарадорлиги масалаларини ўрганиш, шу жумладан, ўз жонига суиқасд қилиш ҳолатларини бартараф этиш борасида амалий ёрдам беришга қаратилган навбатдаги тадбирларни амалга оширишди.

Ушбу тадбирлар Ўзбекистон тиббий-илмий фаолият билан шуғулланувчилар “Табобат” Академияси ҳамда Тошкент шаҳар тиббиёт бирлашмаси қошидаги Психоневрологик диспансер билан ҳамкорликда ташкил этилди.

Ўтказилган учрашувлар давомида фуқароларнинг ўзини ўзи бошқариш органлари ҳамда жамоат ташкилотларини ўз жонига суиқасд (суицид) каби салбий ижтимоий ҳолатларнинг олдини олишга жалб этиш ҳамда бу йўналишда эксперт-таҳлил гуруҳларининг фаолиятини ташкиллаштириш масалалари муҳокама қилинди.

Шу билан бирга, вилоятнинг ҳар бир тумани миқёсида ўз жонига суиқасд қилишнинг сабаблари таҳлил қилинди. Учрашувлар давомида ўз жонига суиқасд қилишнинг олдини олишга қаратилган амалий тадбирлар мутахассислар томонидан профилактика инспекторларига тушунтирилди.