Юридик шахслар жавобгарлиги масалалари бўйича халқаро давра суҳбати

Бош прокуратура Академиясида АҚШ давлат департаментининг халқаро гиёҳвандликка қарши курашиш ва ҳуқуқни муҳофаза қилиш масалалари бюроси кўмагида Шарқий Европа ва Марказий Осиё мамлакатлари учун коррупцияга қарши курашиш тармоғи лойиҳаси доирасида ташкил этилган “Коррупцияга оид ҳуқуқбузарликлар учун юридик шахсларнинг жавобгарлиги: Ўзбекистон модели учун муаммолар ва ечимлар” мавзусида халқаро давра суҳбати бўлиб ўтди.

Тадбирда жиноят ва жиноят-процессуал қонунчиликни такомиллаштириш бўйича ишчи гуруҳлар вакиллари, шунингдек Академия ходимлари ва магистратура тингловчилари иштирок этдилар.

Давра суҳбатида мазкур институтни қўллаш бўйича халқаро стандартлар ва илғор халқаро амалиётлар, юридик шахсларнинг жавобгарлик моделлари, жавобгарликни қўллаш соҳаси, жазо тайинлашнинг турлари ва принциплари, шунингдек, Ўзбекистон Республикасининг Жиноят кодекси ва Жиноят-процессуал кодекси лойиҳаларидаги юридик шахсларнинг жавобгарлиги юзасидан дастлабки қоидалар муҳокама қилинди.

Иштирокчилар томонидан коррупцияни аниқлаш, тергов қилиш ва жиноий жавобгарликка тортиш, коррупция ва халқаро стандартларни амалга ошириш учун жавобгарликнинг муқаррарлигини таъминлаш соҳасида ҳуқуқни муҳофаза қилувчи ва суд органлари салоҳиятини кучайтириш учун юридик шахсларнинг жавобгарлик институти муҳимлиги қайд этилди.