Ўзаро ҳуқуқий ёрдам бўйича тренерлар учун минтақавий тренинг

Жорий йилнинг 7-8 ноябрь кунлари Бош прокуратура Академиясида БМТнинг Гиёҳванд моддалар ва жиноятчилик бўйича бошқармаси ва CАSC тармоғи кўмагида тренерлар учун “Ўзаро ҳуқуқий ёрдам (ЎҲЁ): ЎҲЁ бўйича ўқув марказларининг имкониятларини кенгайтириш” мавзусида минтақавий тренинг ташкил этилди.

Тадбирнинг мақсади ҳуқуқни муҳофаза қилиш органлари ходимларини ўзаро ҳуқуқий ёрдам кўрсатишнинг ўзига хос хусусиятлари бўйича ўқитишни ташкил этиш борасида тажриба алмашиш ҳамда жиноят ишларини тергов қилишда ўзаро ҳуқуқий ёрдам кўрсатиш бўйича Академия иштирокида ишлаб чиқилаётган модулни муҳокама қилишдан иборат.

Тадбирда экспертлар Испания Қироллиги Адлия вазирлигининг ҳуқуқий таълим маркази директори Мария де Лас Херас Гарсия ва Тимишоаре (Руминия) прокуратураси уюшган жиноятчилик ва терроризмни тергов қилиш ҳудудий бошқармаси катта прокурори Алекс Флорин иштирок этди.

Тренингда иштирок этган Қозоғистон, Қирғизистон ва Тожикистон Бош прокуратуралари ходимлари, шунингдек, Бош прокуратура, Ички ишлар вазирлиги, ИИВ Тергов департаменти, Ўзбекистон Республикаси Бош прокуратураси ва Ички ишлар вазирлиги академиялари ваколатли ходимлари Испания, Руминия, шунингдек, минтақа мамлакатларининг ўзаро ҳуқуқий ёрдамни амалга ошириш ва ушбу соҳада таълимни ташкил этиш бўйича тажрибаси ва амалиётини ўрганишди.

Шунингдек, тренинг давомида “Одил судлов учун ўқитиш” (E4J) ташаббуси модули асосида ишлаб чиқилган ўзаро ҳуқуқий ёрдам кўрсатиш бўйича янги ўқув курси лойиҳаси кўриб чиқилди ва уни янада такомиллаштириш бўйича тавсиялар ишлаб чиқилди.

Тадбир якунида иштирокчилар тақдим этилган ўқув модулини ишлаб чиқиш ва уни МДҲ давлатларининг ихтисослашган таълим муассасалари ўқув жараёнига жорий этишда фаол иштирок этишга тайёр эканликларини билдирдилар.