Испания Қироллиги Ҳуқуқий таълим маркази директори билан учрашув

Жорий йилнинг 8 ноябрь куни Бош прокуратура Академиясида Испания Қироллиги Адлия вазирлигининг ҳуқуқий таълим маркази директори Мария де Лас Херас Гарсия билан учрашув ташкил этилди.

Маълумот учун: Марказ прокурорлар, шунингдек, суд котиблари, суд шифокорлари ва бошқа адлия ходимларини тайёрлайди ва малакасини оширади. Бундан ташқари, Марказда суд ишини юритиш соҳасида полиция ходимларини ўқитиш дастурлари мавжуд.

Учрашув давомида Марказ директори Академиянинг таълим фаолияти, қўшма илмий тадқиқотлар ўтказиш, таълим жараёни ва академик алмашинув сифатини ошириш бўйича саъй-ҳаракатларни бирлаштириш соҳасида халқаро ҳамкорлик йўналишлари билан танишди.

Ўз навбатида, М.Гарсия таълим соҳасида ўзаро манфаатли мавзуларда қўшма лойиҳаларни амалга оширишга қизиқиш билдирди.

Учрашув якунида иштирокчилар ҳамкорлик тўғрисида Меморандум имзолаш ва ҳамкорлик дастурини ишлаб чиқиш орқали Испания Қироллиги Адлия вазирлиги ҳуқуқий таълим маркази ва Академия ўртасида ўзаро ҳамкорликни йўлга қўйиш имкониятини кўриб чиқишга тайёр эканликларини билдирдилар.