АҚШлик эксперт Г.Уэддл билан ҳамкорликнинг янги босқичи

Прокуратура органлари ходимларини касбий тайёрлаш соҳасидаги халқаро ҳамкорликни мустаҳкамлашга доир тадбирлар доирасида АҚШлик ҳуқуқ соҳасидаги эксперт, собиқ прокурор Грегори Уэддл Академия фаолиятига жалб этилди.

Таъкидлаш жоизки, Г.Уэддл прокуратура ходимларини касбий тайёрлашни ташкил этиш соҳасида амалий тажрибага эга бўлиб, муқаддам прокурорларни тайёрлаш бўйича федерал муассаса – National Advocacy Center раҳбари ёрдамчиси лавозимида фаолият кўрсатган.

Г.Уэддл 2017-2018 йиллар давомида четдан таклиф этилган профессор сифатида “Минтақавий мулоқот” ХНТ (Словения)нинг АҚШ Давлат департаментининг Гиёҳвандликка қарши курашиш ва ҳуқуқни муҳофаза қилиш фаолияти бюроси (INL) томонидан молиялаштириладиган лойиҳаси доирасида Академиянинг ўқув-илмий салоҳиятини ошириш бўйича тадбирларда иштирок этган.

Эксперт бир неча ой мобайнида прокурор-тергов ва ҳуқуқбузарликлар профилактикаси фаолиятини ташкил этиш масалалари бўйича ўзаро тажриба алмашиш, шунингдек, ўқув-методик ишланмалар, хусусан, масофавий ўқитиш учун материаллар тайёрлаш, шунингдек, Академия магистратура тингловчилари ва ходимлари учун доимий семинарлар ўтказиш борасида амалий ёрдам кўрсатишга қаратилган тадбирларга жалб қилинади.