Бош прокуратура Академияси ҳамда Қозоғистон Республикаси Давлат бошқаруви Академияси ўртасида англашув ва ҳамкорлик тўғрисида Меморандум имзоланди

2019 йил 14 ноябрь куни Бош прокуратура Академиясида Қозоғистон Республикаси Президенти ҳузуридаги Давлат бошқаруви Академияси вице-ректори А.Кошербаева бошчилигидаги делегация билан учрашув ўтказилди.

Ташриф доирасида Қозоғистон Республикаси ДБА вакиллари Академия фаолияти, шу жумладан лойиҳа офиси, электрон таълим ва ахборот-коммуникация технологияларини жорий этиш бўлимлари фаолияти билан яқиндан танишишди.

Томонлар ҳамкорликнинг асосий йўналишлари, шу жумладан академик тажриба алмашиш, коррупцияга қарши курашиш соҳасида қўшма ўқув дастурлари ишлаб чиқиш, муассасаларнинг таркибий тузилмалари ўртасида ўзаро ҳамкорлик ҳамда лойиҳа бошқарувини жорий этиш масалаларини муҳокама қилдилар.

Ташриф давомида Бош прокуратура Академияси ҳамда Қозоғистон Республикаси Президенти ҳузуридаги ДБА ўртасида англашув ва ҳамкорлик тўғрисида Меморандум имзоланди.

Шунингдек, Қозоғистон Республикаси ДБАнинг Лойиҳа бошқаруви маркази бошлиғи А.Сагынаев “Лойиҳа бошқаруви: миллий тажриба ва истиқболлар” мавзусида маъруза қилди.