Таянч докторантурага талабгорлар учун кириш имтиҳони ва мустақил изланувчилар учун малакавий имтиҳон ўтказилди

2019 йил 16 ноябрь куни Бош прокуратура Академиясида таянч докторантурада ўқишга талабгорларни танлаб олиш бўйича чет тилидан кириш имтиҳони ва диссертация тадқиқотларини олиб бораётган мустақил изланувчилар учун чет тили бўйича малакавий имтиҳон бўлиб ўтди.

Имтиҳонлар Ўзбекистон Республикаси Вазирлар Маҳкамасининг 2017 йил 22 майдаги №304-сон қарори билан тасдиқланган Олий ўқув юртидан кейинги таълим тўғрисидаги Низом, шунингдек Ўзбекистон Республикаси Вазирлар Маҳкамаси ҳузуридаги Олий аттестация комиссияси Раёсатининг 2016 йил 28 январдаги 220/2-сон қарори билан тасдиқланган Малакавий имтиҳонларни ўтказиш тартиби тўғрисидаги низом талабларига тўлиқ амал қилинган ҳолда ўтказилди.

Кириш имтиҳони ва малакавий имтиҳон Ўзбекистон давлат жаҳон тиллари университети кафедра мудири, филология фанлари доктори Х.Д.Палуанова раислигидаги Ўзбекистон давлат жаҳон тиллари университети ҳамда Академия вакилларидан иборат комиссия томонидан ўтказилди.

Имтиҳонлар якунида комиссия аъзолари хорижий давлатлар қонунчилик тажрибасини чуқур ўрганиш, таҳлил қилиш ҳамда тадқиқот натижаларини миллий қонунчиликни такомиллаштириш жараёнида қўллаш учун тил билишнинг аҳамияти катта эканлигини таъкидлаб, изланувчи ва номзодларни имтиҳондан муваффақиятли ўтганликлари билан табрикладилар.