Халқаро илмий-амалий конференцияда иштирок этилди

Ўзбекистон Республикаси Бош прокуратураси Академияси вакиллари жорий йилнинг 14-15 ноябрь кунлари Москва шаҳрида бўлиб ўтган «Глобал дунёда ноқонуний даромадларни легаллаштириш ва терроризмни молиялаштиришга қарши курашиш тизими: халқаро иқтисодиётнинг хавф ва хатарлари» мавзусидаги V халқаро илмий-амалий конференцияда иштирок этдилар.

Конференция Россия Федерацияси молиявий мониторинг бўйича хизмати томонидан Г.В.Плеханов номидаги Россия иқтисодиёт университети, «ММФИ» миллий тадқиқот ядро университети ва Молиявий мониторинг халқаро ўқув-методик маркази (ММХЎММ) билан биргаликда ташкил этилган.

Тадбирда йигирма давлатдан 500 нафардан ортиқ экспертлар, шунингдек Россия Федерацияси молиявий мониторинг бўйича хизмати, Фан ва олий таълим вазирлиги  раҳбарияти иштирок этди.

Конференция давомида халқаро иқтисодиётга нисбатан хавф-хатарларнинг ижтимоий-иқтисодий табиати, сунъий идрок, ноқонуний даромадларни легаллаштириш ва терроризмни молиялаштиришга қарши курашиш борасидаги таълим маконининг рақамли трансформацияси, ноқонуний даромадларни легаллаштириш ва терроризмни молиялаштиришга қарши курашиш соҳасида кадрларни тайёрлаш ва бошқа масалалар кўриб чиқилди.