БМТнинг бола ҳуқуқлари тўғрисидаги Конвенцияси қабул қилинганлигининг 30 йиллигига бағишланган халқаро илмий-амалий конференция

2019 йил 20 ноябрь куни Ўзбекистон Республикаси Бош прокуратураси Aкадемияси, ЮНИСЕФ ва Вояга етмаганлар ишлари бўйича республика идоралараро комиссияси ҳамкорлигида БМТнинг бола ҳуқуқлари тўғрисидаги Конвенцияси қабул қилинганлигининг 30 йиллигига бағишланган халқаро илмий-амалий конференция ташкил этилди.

Конференция мамлакатимизда бола ҳуқуқлари тўғрисидаги Конвенция доирасида амалга оширилаётган кенг кўламли ислоҳотлар юзасидан етакчи мутахассислар ва ёш юристлар ўртасида фикр алмашиш учун самарали майдон бўлиб хизмат қилди.

Конференция ишида Бош прокуратура, ЮНИСЕФ, Адлия вазирлиги, Ёшлар иттифоқи, “Юксалиш” умуммиллий ҳаракати вакиллари, шунингдек, Бош прокуратура Академияси, ТДЮУ, ЖИДУ ва ТХВУ магистратура тингловчилари иштирок этдилар.

ЮНИСЕФнинг Европа ва Марказий Осиё мамлакатлари бўйича минтақавий офисининг болаларни ҳимоя қилиш бўйича мутахассиси Фенни Какама Ўзбекистоннинг бола ҳуқуқлари тўғрисидаги Конвенция нормаларини имплементация қилиш соҳасидаги фаол иштирокини ижобий баҳолади, шу билан бирга, ушбу соҳада Aкадемия билан ҳамкорликни кенгайтириш мақсадга мувофиқлигини таъкидлаб ўтди.

Конференция иштирокчилари Конвенция нормаларини ўз органлари ва ташкилотларида имплементация қилиш масалалари, уларни амалга оширишнинг янги ёндашувлари ҳақида сўзлаб бердилар.

Тадбир доирасида ёш муаллифларнинг тасвирий санъат ва бадиий асарлари кўргазмаси, шунингдек, нашриёт уйларининг маҳаллий ва хорижий адабиётларидан иборат китоб ярмаркаси иштирокчиларда катта қизиқиш уйғотди.