Қозоғистон Республикасининг ҳуқуқбузарликлар пофилактикаси ва ҳуқуқий статистика соҳасидаги тажрибаси ўрганилди

Ўзбекистон Республикаси Бош прокуратураси Академияси ташаббуси билан 2019 йил 19 ноябрь куни Қозоғистон Республикаси экспертлари иштирокида видеоконференция шаклида ҳуқуқбузарлик профилактикаси ва ҳуқуқий статистика соҳасига бағишланган семинар ўтказилди.

Семинарда Ўзбекистон томонидан Ўзбекистон Республикаси Бош прокуратурасининг Жиноят-ҳуқуқий статистика бошқармаси раҳбарияти, Академиянинг Жиноятларнинг содир этилиши сабабларини тизимли таҳлил қилиш ва ўрганиш маркази ходимлари, шунингдек, Ички ишлар вазирлиги Академияси вакиллари иштирок этдилар.

Қозоғистон томонидан Қозоғистон Республикаси Бош прокуратурасининг Ҳуқуқий статистика ва махсус ҳисобни юритиш қўмитаси, Жиноий жавобгарликка тортиш хизмати, Бош прокуратура ҳузуридаги Ҳуқуқни муҳофаза қилиш органлари академияси ҳамда Ички ишлар вазирлигининг мутахассислари қатнашдилар.

Тадбирда криминологик прогнозлаш, статистик ҳисобни юритиш ва жиноий ҳуқуқбузарликларнинг келиб чиқиш сабабларини таҳлил қилиш, жиноятларнинг электрон геохариталарини юритиш масалалари атрофлича кўриб чиқилди.

Қозоғистонлик иштирокчилар мамлакатимизнинг жиноят статистикаси тизимида олиб борилган ислоҳотлар билан таништирилди. Шунингдек, Бош прокуратуранинг Жиноят-ҳуқуқий статистика бошқармаси ва Академиянинг Жиноятлар сабабларини тизимли таҳлил қилиш ва ўрганиш маркази фаолияти ҳақида маълумотга эга бўлдилар.

Ўз навбатида, қозоғистонлик мутахассислар “Жиноий ҳуқуқбузарликлар харитаси” дастурий модулининг ишлаш механизми ҳамда Судгача терговларнинг ягона реестрини юргизиш тартиби билан таништирдилар. Профилактика инспекторлари фаолияти билан бевосита боғлиқ бўлган, жиноятларнинг ҳисобини юритиш ва очиш масалалари муҳокама қилинди.

Ҳудудларнинг ўзига хос хусусиятларини эътиборга олган ҳолда, давлат-хусусий шериклиги асосида ҳуқуқбузарлик профилактикасини амалга ошириш борасида тажриба алмашинилди. Озодликдан маҳрум қилиш муассасаларида қамоқ жазосини ўтаб келган фуқароларни реабилитация қилишда жамоат ташкилотларининг, хусусан, ўзини ўзи бошқариш органларининг (маҳалла) иштироки Қозоғистон томонида алоҳида қизиқиш уйғотди.