Мустақил изланувчилар учун малакавий имтиҳон

2019 йилнинг 22 ноябрь куни Бош прокуратура Академиясида мустақил изланувчилар билан “Суд ҳокимияти. Прокурор назорати. Ҳуқуқни муҳофаза қилиш фаолиятини ташкил этиш. Адвокатура” ихтисослиги бўйича малакавий имтиҳон ўтказилди.

Имтиҳон Олий ўқув юртидан кейинги таълим тўғрисидаги Низом ва Ўзбекистон Республикаси Вазирлар Маҳкамаси ҳузуридаги Олий аттестация комиссияси Раёсатининг “Малакавий имтиҳонларни ўтказиш тартиби тўғрисидаги низомни тасдиқлаш ҳақида”ги қарори талабларига тўлиқ амал қилинган ҳолда ўтказилди.

Имтиҳон мамлакатимизнинг кўзга кўринган ҳуқуқшунос олимлари ва бошқа мутахассисларидан иборат таркибда тузилган комиссия томонидан олиб борилди.

Имтиҳонда мустақил изланувчиларга мамлакатимизда суд-ҳуқуқ соҳасида амалга оширилаётган ислоҳотлар, ихтисослик бўйича мавжуд илмий тадқиқотлар ва улардаги замонавий йўналишлар, ихтисослик бўйича тадқиқ этилаётган мавзу доирасида мавжуд илмий муаммолар ва уларнинг ечими юзасидан саволлар берилди.

Малакавий имтиҳонларни муваффақиятли топширган мустақил изланувчиларга гувоҳнома берилди.