Ғарбий ва Марказий Осиё давлатларининг активларни қайтариш бўйича норасмий тармоғи (ARIN-WCA)нинг йиллик умумий йиғилиши бўлиб ўтди

Жорий йилнинг 19-20 ноябрь кунлари Қозоғистон Республикасининг Олмаота шаҳрида Ғарбий ва Марказий Осиё давлатларининг активларни қайтариш бўйича тармоғи (ARIN-WCA) аъзо давлатларининг йиллик умумий йиғилиши бўлиб ўтди.

Тадбирда ARIN-WCAга аъзо давлатлар алоқа вакиллари (прокуратура, ҳуқуқни муҳофаза қилиш ва молиявий разведка идоралари ходимлари), Бирлашган Миллатлар Ташкилотининг Наркотик моддалар ва жиноятчилик бўйича бошқармаси (UNODC), Европа Иттифоқи, Финляндия ташқи ишлар вазирлиги, CARIN (активларни қайтариш бўйича идоралараро Камден тармоғи) ва ARIN-AP (Осиё ва тинч океани давлатларининг активларни қайтариш бўйича тармоғи) тармоқлари, Украина Активларни қайтариш миллий агентлигининг вакиллари ҳамда халқаро экспертлар иштирок этишди.

Йиғилишда ARIN-WCAга аъзо давлатларнинг активларни қайтариш бўйича ижобий тажрибаси ва амалиёти, тармоқ доирасида норасмий ҳамкорликни кенгайтириш масалалари, амалиётда мавжуд муаммолар, шунингдек 2019 йилда амалга оширилган ишлар ҳамда келгуси йилда режалаштирилаётган вазифалар муҳокама қилинди.

Шунингдек, ARIN-WCA Котибияти – Бош прокуратура Академияси вакиллари томонидан тармоқ сайтининг (www.arin-wca.org) тақдимоти иштирокчилар томонидан юқори баҳоланди.

Умумий йиғилиш ишчан ва информатив тарзда ўтказилиб, иштирокчилар фаол ҳамкорлик қилишга ҳамда ARIN-WCA тармоғини келгусида янада ривожлантиришга тайёр эканликларини билдиришди.