Инсон ҳуқуқлари соҳасида таълим масалалари бўйича халқаро семинар

Жорий йилнинг 27 ноябрь куни БМТнинг инсон ҳуқуқлари бўйича умумжаҳон таълим дастурини, 2030 йилгача бўлган давр кун тартибини амалга ошириш, шунингдек Барқарор ривожланиш мақсадлари 4 “Барқарор ривожланиш, жумладан, гендер тенглиги ва инсон ҳуқуқлари манфаатлари йўлида таълим” (БРМ 4.7.1) доирасида “Инсон ҳуқуқлари соҳасида таълим: Ўзбекистон ва Россия Федерациясидаги Инсон ҳуқуқлари бўйича БМТ Олий комиссарининг бошқармаси тажрибаси” мавзусида семинар бўлиб ўтди.

Семинар Инсон ҳуқуқлари бўйича БМТ Олий комиссари бошқармасининг Марказий Осиё бўйича ҳудудий бўлинмаси ҳамкорлигида Инсон ҳуқуқлари бўйича БМТ Олий комиссарининг Россия Федерациясидаги бошқармаси экспертлари иштирокида ташкил этилди.

Тадбирда Судьялар олий кенгаши, Адлия вазирлиги, ИИВ Академияси, Олий ва ўрта махсус таълим вазирлиги, Ташқи ишлар вазирлиги, Инсон ҳуқуқлари бўйича Ўзбекистон Республикаси Миллий маркази, Судьялар олий кенгаши ҳузуридаги Судьялар олий мактаби ҳамда Инсон ҳуқуқлари соҳасида таълим бўйича БМТ умумжаҳон дастурини амалга оширувчи олий ўқув юртлари вакиллари иштирок этдилар.

Учрашув иштирокчилари Инсон ҳуқуқлари соҳасида таълим бўйича БМТ умумжаҳон дастури, унинг Ўзбекистон Республикасида амалга оширилиши, Россия Федерациясидаги Инсон ҳуқуқлари бўйича БМТ Олий комиссари бошқармаси кўмагида Россия олий ўқув юртлари консорциумининг инсон ҳуқуқлари бўйича университетлараро магистрлик дастурини ишлаб чиқиш ва жорий этиш тажрибаси ва амалиёти ҳақида маълумот бердилар.

Семинар давомида таълим дастурларини уйғунлаштириш ва институционализация қилиш, таълим ва инсон ҳуқуқлари умумжаҳон маданиятини ривожлантиришдан манфаатдор вазирликлар, идоралар ва академик доиралар вакиллари ўртасида тармоқлараро ҳамкорлик ва ахборот алмашиш имкониятлари муҳокама қилинди.