Мустақил изланувчилар учун малакавий имтиҳон

2019 йилнинг 23 ноябрь куни Бош прокуратура Академиясида мустақил изланувчилар билан “12.00.09 – Жиноят процесси. Криминалистика, тезкор-қидирув ҳуқуқи ва суд экспертизаси” ихтисослиги бўйича малакавий имтиҳон бўлиб ўтди.

Имтиҳон Ўзбекистон Республикаси Вазирлар Маҳкамаси ҳузуридаги Олий аттестация комиссияси Раёсатининг қарори билан тасдиқланган “Малакавий имтиҳонларни ўтказиш тартиби тўғрисида”ги низом талабларига тўлиқ амал қилинган ҳолда Бош прокуратура Академияси, Тошкент давлат юридик университети, Ҳарбий-техника институти ва Судьялар олий мактабининг профессор-ўқитувчилари ва мутахассисларидан иборат таркибда тузилган комиссия томонидан ўтказилди.

Имтиҳонда мустақил изланувчиларга мамлакатимизда суд-ҳуқуқ соҳасида амалга оширилаётган ислоҳотлар, ихтисослик бўйича мавжуд илмий тадқиқотлар ва улардаги замонавий йўналишлар, ихтисослик бўйича тадқиқ этилаётган мавзу доирасида мавжуд илмий муаммолар ва уларнинг ечими юзасидан саволлар берилди.

Малакавий имтиҳонларни муваффақиятли топширган мустақил изланувчиларга гувоҳнома берилди.