Бош прокуратура Академияси тингловчиларининг Олий судда сайёр машғулоти

Ўзбекистон Республикаси Президентининг 2018 йил 8 майдаги “Прокуратура органлари кадрларини тайёрлаш, қайта тайёрлаш ва уларнинг малакасини ошириш тизимини тубдан такомиллаштириш чора-тадбирлари тўғрисида”ги ПФ–5438-сонли Фармони, Бош прокурор буйруғи билан тасдиқланган Академия Низоми ҳамда Бош прокурор талабларидан келиб чиққан холда ўқитишнинг амалий хусусияти ва прокуратура органларининг касбий фаолияти билан узвий боғлиқликни таъминлаш, шунингдек Республикада ягона суд амалиётини шакллантириш борасида юқори турувчи судлар фаолияти билан танишиш мақсадида “Фуқаролик ва маъмурий суд ишларини юритишда прокурор иштирокининг самарадорлигини ошириш масалалари” мавзусида Бош прокуратура Академиясида ташкиллаштирилган малака ошириш ўқув курсининг тингловчилари учун жорий йилнинг 26 ноябрь куни Ўзбекистон Республикаси Олий судида сайёр машғулот ташкиллаштирилди.

Ушбу машғулот давомида тингловчилар назорат инстанция судида конкрет тоифадаги фуқаролик ва маъмурий ишларни назорат тартибида кўриш бўйича ўтказилган суд мажлисларида иштирок этдилар.

Тингловчилар Ўзбекистон Республикаси Олий судининг фуқаролик ишлари бўйича судлов ҳайъати томонидан кўрилган ўзбошимчалик билан қурилган биноларни мажбурий тартибда бузиш, ишга тиклаш, фуқароларни бошқа турар жой бермасдан мажбурий тартибда кўчириш ҳамда уй-жой низолари билан боғлиқ бошқа тоифадаги фуқаролик ишларининг назорат тартибида кўрилишида иштирок этдилар.

Ушбу фуқаролик ишларининг кўрилишида суд залида ҳозир бўлган тингловчилар юқори турувчи суд инстанциясида прокурорнинг иштироки, унинг ҳар бир кўрилган фуқаролик иши доирасидаги позицияси, юқори турувчи суд инстанциясида ишнинг кўрилиши натижалари бўйича прокурор фикрида акс эттириладиган масалалар, қайд этилган тоифадаги фуқаролик ишлари бўйича назорат суд инстанциясининг амалиёти билан яқиндан танишдилар.

Шунингдек, сайёр машғулот давомида тингловчиларга республикамизда фаолият юритаётган фуқаролик ва маъмурий судларнинг тизими, суд амалиётида учраётган муаммолар ҳамда суд жараёнларини ўтказишда видеоконференцалоқа тизимидан фойдаланиш имкониятлари хусусида тушунтиришлар берилди.

Сайёр машғулот якуни бўйича Академиянинг судларда прокурор ваколатини таъминлаш кафедраси ўқитувчилари ва тингловчилари суд-прокурор амалиётидаги бир қатор масалалар бўйича фикр алмашдилар.