Полигон шароитида амалий ва касбий маҳоратни мустаҳкамлаш

Бош прокуратура Академиясининг магистратура тингловчилари учун ўқув дастури доирасида Ички ишлар вазирлиги Академияси кўмагида полигон шароитида ўқув ва амалий сайёр машғулотлар ташкил этилди.

Тадбирларнинг асосий мақсади дала шароитида ўқув машғулотларини ўтказиш, тингловчилар томонидан жанговар, саф ва жисмоний тайёргарлик асосларини ўзлаштириш ҳисобланади.

Шунингдек, полигонда тегишли фанлар бўйича таълим олишни узлуксиз давом эттириш мақсадида барча зарур шароитлар яратилган. Хусусан, Бош прокуратура Академиясининг профессор-ўқитувчилари томонидан ҳар куни сайёр ўқув машғулотлари ўтказилиб, уларда тингловчилар тажрибали устозлар раҳбарлиги остида ҳақиқий ҳолатга яқин бўлган вазиятда турли хил тергов ҳаракатларини амалга ошириш ва криминалистика соҳасидаги касбий кўникмаларини мустаҳкамлаш имкониятига эга бўлмоқдалар.

Тингловчилар ўқиш жараёнидан бўш вақтларида ўзининг билим ва салоҳиятини янада ошириш мақсадида ИИВ Академияси полигонининг электрон кутубхонаси ва спорт билан шуғулланиш учун тегишли мажмуадан фойдаланиш имкониятига эга.

Академия магистратурасининг илк битирувчилари тажрибаси шундан далолат берадики, полигонда яратилган шароитлар ва куннинг ўқув жараёни билан боғлиқ тадбирларга бой бўлганлиги тингловчилар ўртасида дўстона муносабатни шакллантириб, жамоавий руҳни мустаҳкамлашга ҳамда улар ўртасида самарали тажриба алмашинувига ижобий таъсир кўрсатади.