Прокуратура органларида кадрларни тайёрлашнинг тарихий жиҳатларига бағишланган илмий-амалий конференция

2020 йил 28 октябрда Бош прокуратура Академияси «Прокурорларни профессионал тайёрлаш тизимининг 100 йиллиги: ўтмишга назар» мавзусида конференция ўтказди.

Конференциянинг асосий мақсади – Туркистон ўлкасида прокуратура органларида кадрларни тайёрлаш ва қайта тайёрлаш тизимининг шаклланишига доир тарихий босқичларини кўрсатиш эди. Ташкилотчилар томонидан қўйилган асосий вазифа ўтмиш сабоқларидан келажакдаги стратегик режаларни шакллантириш бўлиб ҳисобланади.

Тадбир жараёнида ўз маърузалари билан Қорақалпоқ Давлат Университети кафедра мудири, ю.ф.д. М.Ш.Нажимов, Юристлар малакасини ошириш маркази биринчи проректори, ю.ф.д., проф. А.А.Отажонов, Мирзо Улуғбек номидаги Миллий Университет ўқитувчиси М.Р.Топилдиева, Тошкент Давлат юридик Университети профессори, ю.ф.д. Г.Тўлаганова, Жаҳон иқтисодиёти ва дипломатия университети биринчи проректори, ю.ф.д. Г.С.Исмаилова, ЖИДУ қошидаги юридик клиника раҳбари, ю.ф.н. З.С.Убайдуллаев, шунингдек Бош прокуратура Академияси доценти, ю.ф.д. Г.Р.Маликова иштирок этдилар.

Конференция иштирокчиларига прокуратура органлари ходимларининг профессионал тайёргарлиги тизими шаклланиши ва ривожланишига бағишланган ва келиб чиқиш асослари  бўйича жамоат айбловчи ва ҳимоячиси, судьялар, суд терговчилари, суд инспекторлари учун Туркистон ўлкасида 100 йил олдин 1920 йилда ташкил этилган юридик курсларга доир видеоролик тақдим этилди.

Конференцияда республикада фаолият кўрсатаётган етакчи таълим муассасалари – Ўзбекистон Республикаси Президенти ҳузуридаги Давлат бошқаруви Академияси, Ўзбекистон Республикаси Судьялар Олий Кенгаши ҳузуридаги Судьялар Олий мактаби, Миллий гвардия Ҳарбий-техник институти, Ички Ишлар вазирлиги Академияси вакиллари билан бир қаторда Ўзбекистон Республикаси Бош прокуратурасида фаолият юритаётган масъул ходимлар ҳам иштирок этди.

Конференция якунлари бўйича мунозаралар бўлиб ўтди, шунингдек иштирокчилар томонидан ушбу соҳани ривожлантириш борасида илмий тадқиқотларни давом эттиришга доир таклифлар ишлаб чиқилди.