ARIN-WCA тармоғи Бошқарув гуруҳи аъзоларининг учрашуви

2020 йилнинг 23-24 январь кунлари Ўзбекистон Республикаси Бош прокуратураси Академиясида Бирлашган Миллатлар Ташкилотининг Наркотик моддалар ва жиноятчилик бўйича бошқармаси билан ҳамкорликда Ғарбий ва Марказий Осиё давлатларининг активларни қайтариш бўйича идоралараро тармоғи (ARIN-WCA) Бошқарув гуруҳининг 2020 йил учун режалаштирилган биринчи учрашуви бўлиб ўтди.

Учрашувда ARIN-WCA Бошқарув гуруҳининг аъзолари – Қозоғистон, Қирғизистон, Покистон, Туркманистон ва Ўзбекистон вакиллари ҳамда хорижий экспертлар иштирок этишди.

Иштирокчилар ва экспертлар ARIN-WCAни самарали бошқариш ва унинг фаолиятини янада ривожлантириш, тармоқ бошқарувини назорат қилиш, активларни қайтариш соҳасида ҳамкорликни кенгайтириш, унинг стратегик ривожланиши, тармоққа аъзо бўлиш ва унда иштирок этишнинг механизмларини такомиллаштириш, алоқа вакилларининг салоҳиятини ошириш учун ўқув курсларини ташкил этиш, тармоқнинг йиллик умумий йиғилишини ўтказиш ва шу каби бошқа ташкилий масалаларни муҳокама қилишди.

ARIN-WCA Котибияти сифатида Бош прокуратура Академияси вакиллари Бошқарув гуруҳи аъзоларини тармоқни бошқариш борасида амалга оширилган ишлар ва келгусидаги муҳим режалар тўғрисида хабардор қилишди.

Бошқарув гуруҳининг учрашуви ишчан ва конструктив руҳда ўтказилиб, унинг якунларига кўра иштирокчилар ARIN-WCA доирасида фаол ҳамкорлик қилишга ҳамда мазкур тармоқни янада ривожлантиришга келишиб олишди.