Раҳбар кадрларни қайта тайёрлаш курсига қабул бўйича танлов бўлиб ўтмоқда

Академияда прокуратура органларида раҳбарлик лавозимларини эгаллаш учун захирада турган кадрларни касбий қайта тайёрлаш курсига қабулнинг учинчи, якуний босқичи бошланди. Имтиҳон якка тарздаги суҳбат кўринишида, видеоконференцалоқа имкониятларини қўллаган тарзда ташкил этилди.

Имтиҳон Бош прокурор буйруғига асосан ташкил этилган, Бош прокурор ўринбосари Э.Т.Юлдашев раислигида Академия ҳамда Бош прокуратуранинг тегишли тармоқлари раҳбариятидан иборат  махсус комиссия томонидан ўтказилмоқда.

Мазкур курсга қабулни уч босқичли танлов асосида ўтказиш тартиби Бош прокурор буйруғи билан тасдиқланган тартибга мувофиқ 2019 йилда жорий қилинган бўлиб, масофавий таълим ҳамда ҳар бир босқич якунига кўра оралиқ назоратни ўз ичига олган.

Якуний босқичга дастлаб танланган 200 нафардан зиёд номзод орасидан олдинги босқичларни муваффақиятли якунлаган 50 нафар номзод ўтди.

Номзодлар томонидан имтиҳон билетларини танлаш Академия магистратурасига қабул жараёнлари давомида ижобий натижа кўрсатган, Академия томонидан ТАТУ билан ҳамкорликда яратилган платформа асосида ўтказиладиган автоматик электрон генерация орқали  амалга оширилди.

Шаффоф ва объектив тарзда ўтказилган танлов прокурор-тергов ва таҳлилий ишларни юритиш, норма ижодкорлиги фаолиятида иштирок этиш юзасидан касбий билим ҳамда кўникмаларни чуқурлаштиришга, шунингдек, ишни ташкил этишнинг инновацион шакллари ва методларини ҳамда бошқарув асосларини ўзлаштиришга йўналтирилган прокуратура органларида раҳбарлик лавозимларини эгаллаш учун захирада турган кадрларни касбий қайта тайёрлаш курсини сифатли ташкил этишга хизмат қилади.

Мазкур имтиҳон якунлангандан сўнг номзодлар ўз иш фаолиятидан келиб чиқиб тайёрлаган тақдимотларини (таҳлилий иш, норматив-ҳуқуқий ҳужжат лойиҳаси, амалий қўлланма) ҳимоя қиладилар.