Судьялар олий мактаби билан Меморандум имзоланди

2020 йилнинг 30 октябрида Бош прокуратура Академияси ва Ўзбекистон Республикаси Судьялар олий кенгаши ҳузуридаги Судьялар олий мактаби ўртасида ўзаро ҳамкорлик тўғрисида Меморандум имзоланишига бағишланган тадбир бўлиб ўтди.

Тадбирда Академия ҳамда Судьялар олий мактабининг раҳбарияти ва профессор-ўқитувчилари иштирок этдилар.

Томонлар ҳар икки муассаса ўртасида шаклланган алоқалар, ҳамкорликда амалга оширилаётган тадбирлар хусусида батафсил тўхталиб, ушбу ҳамкорликни доимий ва тизимли равишда йўлга қўйилишининг аҳамияти ва қимматини алоҳида таъкидлаб ўтдилар.

Ўзаро ҳамкорлик доирасида тергов, суд ва прокуратура ходимлари учун  қўшма ўқув машғулотларини, шу жумладан семинар ва мустақил машғулотларни суд-тергов ва прокурор амалиёт ҳужжатларига асослантирилган ҳолда ташкиллаштириш, ўқитишни таълимнинг замонавий инновацион шакл ва усулларини жорий этган ҳолда амалга ошириш, ўзаро илмий-амалий тажриба алмашиш, ҳуқуқни қўллаш соҳасидаги ўта долзарб муаммолар юзасидан қўшма тадқиқотлар ва тадбирлар ўтказиш, суд-тергов ҳамда ҳуқуқни қўллаш амалиётини таҳлил этиб бориш, ҳамкорликда тингловчилар учун ўқув-методик база яратиш, шунингдек илмий-методик таъминлаш соҳасида муҳим бўлган йўналишлар бўйича фикр алмашилди.

Томонлар ўртасида имзоланган Меморандум ўзаро ҳамкорликнинг асосий йўналишларини аниқ белгилаб берган бўлиб, унда белгиланган тадбирларнинг ижроси ҳуқуқни қўллаш  амалиётида мавжуд бўлган муаммоларнинг ечимини беради ҳамда кадрларни тайёрлаш ва уларнинг малакасини ошириш ишида аҳамиятга эга бўлади. 

Меморандум икки томонлама ҳамкорликнинг янада ривожланишига хизмат қилади.