Давлат солиқ қўмитаси тизими ходимлари учун малака ошириш курси ташкил этилди

2020 йил 2 ноябрдан бошлаб Бош прокуратура Академияси ва Давлат солиқ қўмитаси ҳузуридаги Малака ошириш маркази ҳамкорлигида давлат солиқ хизмати органлари тизимида фаолият юритаётган ходимлар учун ProAcademy электрон ахборот-таълим портали базасида масофавий малака ошириш курси бошланди.

Курс дастури солиқ қонунчилигидаги янгиликлар мазмун-моҳиятини етказиш, пандемия шароитида солиқ маъмурчилигидаги айрим ўзгаришлар, соҳадаги тизимли камчиликларни бартараф этиш бўйича ходимларнинг касбий кўникма ва малакаларни такомиллаштириш масалаларини қамраб олган.

Шу билан бирга, ўқув курси машғулотлари доирасида иқтисодий жиноятларга қарши курашишни ташкил этиш, жиноий фаолиятдан олинган даромадларни легаллаштириш ва жавобгарликга оид машғулотлар ўрин олган.

Мазкур масофавий курс давлат солиқ хизмати органлари ходимларининг малакасини оширишга қўйилган талаблар асосида ходимларнинг касбий кўникма ва малакаларини такомиллаштиришга ҳамда юридик шахсларга хизмат кўрсатиш сифатини оширишга хизмат қилади.