“Суд ҳужжатлари ва бошқа органлар ҳужжатлари ижро этилишининг қонунийлигини таъминлашда прокурор назорати” ўқув қўлланмаси тайёрланди

Прокуратура органларида қонунчиликни такомиллаштириш ва ягона ҳуқуқни қўллаш амалиётини шакллантириш бўйича илмий асосланган хулоса ва тавсиялар ишлаб чиқиш Бош прокуратура Академиясининг асосий вазифаларидан биридир.

Мазкур вазифа ижросини таъминлаш мақсадида Академия томонидан Бош прокуратура ҳузуридаги Мажбурий ижро бюросининг суд ҳужжатлари ва бошқа органлар ҳужжатларини ижро этиш фаолияти мунтазам равишда ўрганилиб, давлат ижрочилари томонидан қонун ҳужжатларини амалиётга татбиқ этишда йўл қўйилаётган хато ва камчиликларни аниқлаш ҳамда уларни бартараф этишда прокурор назорати самарадорлигини оширишга қаратилган муайян илмий тадқиқотлар олиб борилмоқда.

Мазкур тадқиқотлар натижалари асосида Академия мутахассислари томонидан “Суд ҳужжатлари ва бошқа органлар ҳужжатлари ижро этилишининг қонунийлигини таъминлашда прокурор назорати” мавзусида ўқув қўлланма ишлаб чиқилди.

Ушбу қўлланмада суд ҳужжатлари ва бошқа органлар ҳужжатларини ижро этилишида иштирок этувчи шахсларнинг ҳуқуқ ва қонуний манфаатларини ҳимоя қилинишини таъминлаш ҳамда давлат ижрочилари томонидан ижро ҳаракатларини қонунларга риоя этган ҳолда, амалга оширилиши устидан прокурор назоратини ташкил этиш ва аниқланган ҳолатлар юзасидан тегишли прокурор назорати ҳужжатларини қўллашга доир тавсиялар баён этилган.