Жиноий фаолиятдан олинган даромадларни легаллаштириш ва терроризмни молиялаштириш хавфларини аниқлаш масалалари бўйича халқаро тренинг ўтказилди

Академия томонидан БМТнинг Наркотиклар ва жиноятчиликка қарши курашиш бўйича бошқармасининг Марказий Осиёдаги минтақавий ваколатхонаси ва Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти билан ҳамкорликда АҚШнинг Ўзбекистондаги элчихонаси кўмагида 2020 йилнинг 21-24 январь кунлари жиноий фаолиятдан олинган даромадларни легаллаштириш ва терроризмни молиялаштириш хавфларини аниқлаш, шунингдек операцион ва стратегик таҳлил масалалари бўйича минтақавий тренинг ўтказилди.

Тадбирда Қозоғистон, Украина ва Ўзбекистондан халқаро экспертлар, шунингдек Академия, Департамент, Марказий банк ва 11 та тижорат банкларининг вакиллари иштирок этдилар.

Тренинг давомида ФАТФ тавсиялари билан боғлиқ операцион таҳлил, жиноий фаолиятдан олинган даромадларни легаллаштириш ва терроризмни молиялаштириш билан боғлиқ шубҳали фаолиятни таҳлил қилиш асосий концепциялари, миллий ва соҳавий хавфларни баҳолаш, самарали ички назорат элементлари ва бошқа масалалар кўриб чиқилди.

Шунингдек, мижозларни лозим даражада ўрганиш ҳамда текшириш босқичлари билан боғлиқ қатор амалий машғулотлар ўтказилди.

Тадбир Департамент, Марказий банк ва тижорат банклари вакиллари ўртасида мижозларнинг фаолиятини ўрганиш, уларнинг операцияларини мониторинг қилиш самарадорлигини ошириш, шубҳали операциялар ҳақида хабар бериш каби долзарб масалалар юзасидан фикр алмашиш учун қулай имконият яратди.

Тренинг якунлари бўйича иштирокчиларга сертификатлар топширилди.