Халқаро стандартлар асосида андрагогика соҳасидаги кўникмаларни такомиллаштириш

Бош прокуратура Академияси томонидан Немис Халқ Университетлари ассоциацияси (DVV International) Халқаро ҳамкорлик институтининг Ўзбекистондаги филиали билан ҳамкорликда “Ўзбекистон Республикаси таълим тизими ходимлари малакасини ошириш тизимини ривожлантириш бўйича ҳамкорлик” лойиҳаси Curriculum globALE дастури доирасида профессор-ўқитувчилар учун масофавий малака ошириш курси ташкил этилди.

Курс катта ёшдагилар таълими – андрогогикани ташкил этишнинг замонавий методика ва технологияларини ўрганиш ҳамда уларни таълим жараёнига татбиқ этиш кўникмаларини ривожлантириш мақсадида ташкил этилди.

Малака ошириш курси асинхрон режимда ташкил этилиб, бу ўқиш ва меҳнат фаолиятини уйғун тарзда олиб бориш учун қўшимча имконият яратади.

Курс дарстури 5 модульдан иборат бўлиб, унда андрагогикадаги асосий ёндашувлар, катталар таълими ва катта ёшдагилар аудиториясида дарс бериш, андрагогикада коммуникация ва гуруҳ динамикаси, катталар таълими методикаси, катталар таълим олишини режалаштириш, ташкил этиш ва баҳолаш каби масалалар ўрин олган.

Айни дамда биринчи модуль машғулотлари ўтказиб келиниб, бугунга қадар андрагогиканинг асосий жиҳатлари, андрагогика ва педагогиканинг умумий ва ўзаро фарқ қиладиган характеристикалари, катталар таълими соҳасидаги замонавий тенденциялар ва уларнинг миллий таълим тизимига жорий этилиши каби масалалар кўриб ўтилди.

Мазкур малака ошириш курси профессор-ўқитувчилар учун тизимли ташкил этиб келинаётган ўқув семинарларидан бири сифатида халқаро таълим сифати стандартларини инобатга олган ҳолда Академия профессор-ўқитувчиларининг ўқув-амалий фаолияти самарадорлигини ҳамда касбий педагогик маҳоратини оширишга хизмат қилади.